سب مل کر ترکی کی صدی بنائیں گے، ترک صدر رجب طیب اِردوان

شیعیت نیوز: ترکی کے صدر رجب طیب اِردوان نے کہا ہے کہ یہ دراصل جمہوریت کی فتح ہے، ہم سب مل کر ترکی کی صدی بنائیں گے۔

ترکی کے صدارتی انتخاب کے حتمی مرحلے میں کامیابی کے بعد صدارتی محل سے عوام کے بڑے مجمعے سے خطاب کرتے ہوئے ترک صدر رجب طیب اِردوان نے کہا کہ آپ نے ہمیں دوبارہ یہ ذمے داری دی ہے، ہم سب مل کر اسے ترکی کی صدی بنائیں گے۔

یہ بھی پڑھیں : جدہ، مکہ اور مدینہ میں ایرانی قونصلر سیکشن فعال

صدر اِردوان کا کہنا تھا کہ آج کوئی نہیں ہارا، آج کا فاتح صرف اور صرف ترکی ہے، یہ فتح ترکی کے تمام ساڑھے 8 کروڑ باشندوں کی فتح ہے، یہ جمہوریت کی فتح ہے، آئندہ 5 سال کے لیے حکومت کی ذمہ داری سونپنے پر ہر ایک کا شکریہ۔

ان کا کہنا تھا کہ ترکی کی تاریخ کے سب سے اہم الیکشن میں سے ایک میں آپ نے ترکی کی صدی کا انتخاب کیا، یہ وقت متحد اور اکٹھا ہونے کا ہے، اب یہ کام کرنے کا وقت ہے۔

یہ بھی پڑھیں : قاسم الاعرجی کی سربراہی میں عراقی سکیورٹی وفد تہران روانہ

اردوان کا کہنا تھا کہ آج سلطنت عثمانیہ کو استنبول فتح کیے ہوئے 570 برس ہو جائیں گے، وہ ہماری تاریخ میں ایک ٹرننگ پوائنٹ تھا جس نے ایک صدی کو ختم اور ایک نئے باب کا آغاز کیا، امید ہےکہ یہ الیکشن بھی ویسا ہی ایک ٹرننگ پوائنٹ ہے۔

ترک صدر کا کہنا تھا کہ ہماری اولین ذمہ داری ان شہروں کی آباد کاری ہے جو 6 فروری کے زلزلے میں تباہ ہوئے، ہم لوگوں کی زندگی کو بہتر بنائیں گے اور مہنگائی کم کریں گے۔