ایران جنگ کے اثرات، ٹرمپ کی مقبولیت ریکارڈ کم ترین سطح پر، امریکی سروے

شیعیت نیوز : ایران کے خلاف جنگ کے اثرات امریکہ کے اندر نمایاں ہونے لگے ہیں، اور ایک تازہ امریکی قومی سروے کے مطابق امریکی صدر ڈونلڈ ٹرمپ کی کارکردگی سے مطمئن امریکی شہریوں کی شرح کم ہو کر 33 فیصد رہ گئی ہے، جو ان کے دونوں صدارتی ادوار کی کم ترین سطح ہے۔

یہ بھی پڑھیں : مارو اور بھاگو کا دور ختم، ہر حملے کا جواب دیں گے، ترجمان ایرانی وزارت خارجہ

امریکی تجزیہ کاروں کے مطابق ٹرمپ کی مقبولیت میں کمی، ایران کے خلاف جنگ کے باعث ایندھن کی قیمتوں میں اضافے اور ری پبلکن جماعت کے اندر بڑھتے اختلافات نے وائٹ ہاؤس کے لیے سیاسی و معاشی مشکلات میں اضافہ کر دیا ہے۔ ایک امریکی نشریاتی ادارے کے سیاسی تجزیاتی پروگرام میں ماہرین نے کہا کہ صدر کی کمزور سیاسی پوزیشن براہ راست ان کی جماعت کے امیدواروں کی عوامی قبولیت کو متاثر کر رہی ہے۔

سروے کے مطابق ٹرمپ سے ناراضی خود ان کی جماعت کے اندر بھی بڑھ رہی ہے، اور "میک امریکا گریٹ اگین” تحریک سے وابستہ نہ ہونے والے تقریباً نصف ری پبلکن ووٹر ان کی کارکردگی سے ناخوش ہیں۔ اسی صورتحال کے باعث نومبر کے وسط مدتی انتخابات سے پہلے ڈیموکریٹس کو قومی سطح پر آٹھ فیصد برتری حاصل ہو گئی ہے۔

رپورٹ کے مطابق ٹرمپ نے ستمبر میں وعدہ کیا تھا کہ وہ ری پبلکن امیدواروں کی حمایت کے لیے 35 اہم انتخابی حلقوں کا دورہ کریں گے، لیکن وہ اب تک ان میں سے ایک تہائی سے بھی کم حلقوں میں گئے ہیں اور زیادہ تر ان علاقوں کا رخ کر رہے ہیں جہاں ان کی جماعت پہلے ہی مضبوط ہے۔ امریکی ماہرین کے یہ اعترافات ظاہر کرتے ہیں کہ ایران کے خلاف جنگ کی قیمت خود امریکی صدر کو اپنی گرتی مقبولیت کی صورت میں چکانا پڑ رہی ہے۔