امریکہ موجودہ حقائق جانتے ہوئے اپنا تسلط قائم رکھنے کے لئےکوشاں ہے، ولادیمیر پوتن

شیعیت نیوز: روس کے صدر نے کہا ہے کہ امریکہ جانتا ہے کہ دنیا تبدیل ہوچکی ہے اس کے باوجود وہ اپنا تسلط قائم رکھنے کی کوشش کر رہا ہے۔

روسی صدر ولادیمیر پوتن نے روسی شہریوں کے سوال و جواب کے ایک پروگرام میں کہا کہ امریکہ سمجھ چکا ہے کہ دنیا بدل رہی ہے لیکن پھر بھی وہ دنیا پر اپنا تسلط قائم رکھنے کی کوشش کر رہا ہے اور اس کے اتحادی بھی امریکیوں کے اس رویے سے خوش نہیں ہیں۔

ولادیمیرپوتن نے ماسکو اور واشنگٹن کے تعلقات معمول پر آنے کی امید ظاہر کرتے ہوئے کہا کہ واشنگٹن کی جانب سے ماسکو پر امریکی انتخابات میں مداخلت، سائبر حملوں اور امریکی مفادات کے خلاف روسیوں کے اقدامات کے الزامات کے باعث حالیہ عشرے میں امریکہ اور روس کے تعلقات خراب ہوئے ہیں جبکہ کرملین نے ان الزامات کو ہمیشہ مسترد کیا ہے۔

یہ بھی پڑھیں : اقوام متحدہ کی سلامتی کونسل کا ایران کے خلاف امریکی پابندیوں کی منسوخی پر زور

روس اور امریکہ کے سربراہوں نے حالیہ جینوا اجلاس کے موقع پر سائبر سیکورٹی اور اسلحوں کے کنٹرول کے بارے میں مزید گفتگو پر اتفاق رائے کو ایک مثبت قدم قرار دیا ہے۔امریکہ اور روس کے سربراہوں نے دونوں ملکوں میں اپنے سفیر دوبارہ بھیجے جانے پر بھی اتفاق کیا ہے، مگر اس کے باوجود دونوں ملکوں میں کشیدگی جوں کی توں برقرار ہے۔

دوسری جانب روسی وزارت خارجہ نے امریکہ کی جانب سے ایرانی و یمنی صحافتی ویب سائٹوں کی بندش کی شدید مذمت کی ہے۔

تفصیلات کے مطابق روسی وزارت خارجہ کی ترجمان ماریا زاخاروا نے خبرنگاروں کے ساتھ گفتگو کرتے ہوئے ایرانی نیوز چینلوں پریس ٹی وی و العالم اور یمنی نیوز چینل المسیرہ کی ویب سائٹوں پر امریکہ کی جانب سے پابندیوں کے عائد کئے جانے پر شدید تنقید کرتے ہوئے خبرنگاروں کے ساتھ گفتگو میں کہا کہ امریکہ میں واقع ’’انٹرنیٹ فراہم کرنے والی کمپنیوں‘‘ نے 22 جون کے روز ایرانی میڈیا سے متعلق 30 ویب سائٹوں کو بند کر دیا تھا جبکہ ہم سیاسی بنیادوں پر ان صحافتی ویب سائٹوں کی بندش اور واشنگٹن کے مفاد کی خاطر جمہوری اقدار کے پائمال کئے جانے کے اس اقدام کی شدید مذمت کرتے ہیں۔