تیل کے ذخائر خالی کرنے سے امریکی معاشی پالیسیوں کے نتائج سنگین ہوں گے، محمد باقر قالیباف

شیعیت نیوز : ایرانی پارلیمنٹ کے اسپیکر محمد باقر قالیباف نے امریکی وزیر خزانہ اسکاٹ بیسنٹ کو مخاطب کرتے ہوئے متنبہ کیا ہے کہ دنیا اس وقت امریکہ کو ایسے مقام پر دیکھ رہی ہے جہاں اس کی معاشی پالیسیوں کے نتائج انتہائی سنگین صورت اختیار کر سکتے ہیں۔ انہوں نے امریکی وزیر خزانہ کو مشورہ دیا کہ وہ عمان کے مستقبل کے تیل کی قیمتوں، امریکی حکومت کے بانڈز کی شرح منافع اور امریکہ کے تزویراتی تیل کے ذخائر کی موجودہ صورتحال پر کڑی نظر رکھیں۔

قالیباف نے طنزیہ انداز میں کہا کہ اگر امریکی حکومت مستقبل کے تیل کی قیمتوں کو نیچے لانے کے لیے مزید مداخلت کرنا چاہتی ہے تو پوری قوت سے کوشش کرے، کیونکہ اسکاٹ بیسنٹ کی پیشہ ورانہ ساکھ بھی ان اقدامات کے نتائج سے جڑی ہوئی ہے۔ انہوں نے مزید کہا کہ امریکہ اپنے تزویراتی ذخائر سے ضرورت سے زیادہ تیل نکالنے کا سلسلہ جاری رکھ سکتا ہے، لیکن اس سے زیرِ زمین نمک کے غاروں میں موجود تیل کے ذخائر کی ساختی پائیداری کو شدید خطرات لاحق ہو سکتے ہیں، اور پوری دنیا پاپ کارن لے کر یہ صورتحال دیکھ رہی ہے۔

یہ بھی پڑھیں : طوفان الاقصی کے بعد صہیونی معیشت تباہی کے دہانے پر، سرکاری قرضہ 1.4 ٹریلین شیکل سے متجاوز

اسپیکر ایرانی پارلیمنٹ کے مطابق، ایران کے ساتھ جنگ اور آبنائے ہرمز میں پیدا ہونے والی رکاوٹوں کے باعث امریکہ نے اپنے تزویراتی پٹرولیم ذخائر سے بڑی مقدار میں تیل جاری کیا ہے، جس کے نتیجے میں امریکی تیل کے ہنگامی ذخائر کئی دہائیوں کی کم ترین سطح پر آ گئے ہیں۔ واضح رہے کہ امریکہ کے یہ ذخائر ٹیکساس اور لوزیانا کے زیرِ زمین غاروں میں محفوظ ہیں، جنہیں حد سے زیادہ خالی کرنے پر غاروں کے اندر دباؤ، دیواروں کے استحکام، کنوؤں کی ساختی سالمیت اور مستقبل میں ذخیرہ کرنے کی صلاحیت تباہ ہونے کا خدشہ ہے۔

دوسری جانب، ایرانی حکام نے واضح کیا ہے کہ بعض تیل کے تاجروں نے امریکی حکام کے اشاروں کی بنیاد پر مستقبل میں تیل کی قیمتوں میں کمی کی توقعات قائم کر رکھی تھیں جو بے بنیاد ثابت ہوئیں۔ زمینی حقائق کے مطابق، عمان اور متحدہ عرب امارات سے متعلق مستقبل کے تیل کی قیمتوں میں حالیہ دنوں میں نمایاں اضافہ ریکارڈ کیا گیا ہے، اور بعض معاملات میں یہ قیمتیں 100 ڈالر فی بیرل کی سطح سے بھی تجاوز کر گئی ہیں۔