آیت اللہ العظمیٰ بشیر نجفی سے ویٹیکن کے سفیر کی ملاقات، عالمی امن و بقائے باہمی پر زور

شیعیت نیوز : مرجع عالی قدر آیت اللہ العظمیٰ الحاج حافظ بشیر حسین نجفی (دام ظلہ) نے اپنے مرکزی دفتر میں جمہوریہ عراق کے لیے پوپ کے نمائندے اور ویٹیکن کے سفیر مونسیگنور میروسلاف اسٹانیسلاف واشوفسکی کا پروقار استقبال کیا۔ ان کے ہمراہ عراق اور دنیا بھر کی کلدانی مسیحی برادری کے سربراہ بطریق پولس سوم نونا اور ایک اعلیٰ سطحی وفد بھی موجود تھا جس نے مرجعیت سے خصوصی ملاقات کی۔

اس اہم ملاقات کے دوران مختلف انسانی و معاشرتی امور بالخصوص تمام مذاہب کے پیروکاروں کے درمیان محبت، رواداری اور پُرامن بقائے باہمی کے اقدار کو فروغ دینے پر تفصیلی تبادلہ خیال کیا گیا۔ عالمی سطح پر جاری تباہ کن جنگوں اور تنازعات کے تناظر میں انسانی جانوں کی حرمت، شہریوں کے حقوق کے تحفظ اور دنیا بھر میں امن و استحکام کی فضا قائم کرنے کی ضرورت پر خصوصی زور دیا گیا۔

یہ بھی پڑھیں : جامعۃ الکوثر میں سید احمد اشکوری کے اعزاز میں عظیم الشان علمی نشست، عصر حاضر کے چیلنجز پر گفتگو

آیت اللہ العظمیٰ بشیر نجفی اور معزز مہمانوں کے درمیان انسانی مشترکہ اقدار کو مضبوط بنانے اور مختلف طبقات کے مابین افہام و تفہیم کے فروغ پر بھی اتفاق کیا گیا۔ مذہبی رہنماؤں نے واضح کیا کہ مسلسل مکالمے اور باہمی احترام کے ذریعے ہی معاشرے میں حقیقی امن قائم کیا جا سکتا ہے، جس سے ہر انسان کی عزت، کرامت اور اس کے بنیادی حقوق کا مکمل تحفظ یقینی بنایا جا سکے۔

بعد ازاں، ویٹیکن کے اس اعلیٰ سطحی وفد نے مرجع عالی قدر کے فرزند اور مرکزی دفتر کے مدیر حجۃ الاسلام و المسلمین شیخ علی نجفی سے بھی خصوصی ملاقات کی۔ اس نشست میں عراقی عوام کے درمیان بھائی چارے، شہری ذمہ داری، قومی وابستگی اور مذہبی قیادتوں کے درمیان مسلسل رابطے کی اہمیت کو اجاگر کیا گیا تاکہ معاشرے کے متنوع سماجی تانے بانے اور ملکی اتحاد کو ہمیشہ کے لیے محفوظ رکھا جا سکے۔