قاہرہ میں فلسطینی قومی مذاکرات کا نیا دور شروع، حماس اور الفتح سمیت مزاحمتی تنظیموں کی شرکت

شیعیت نیوز : فلسطینی مزاحمتی تحریکوں اور مختلف سیاسی جماعتوں کے نمائندوں کی شرکت کے ساتھ مصر کے دارالحکومت قاہرہ میں فلسطینی قومی مذاکرات کا ایک نیا دور شروع ہوگیا ہے۔ ان اہم مذاکرات کا بنیادی مقصد فلسطینی دھڑوں کے درمیان جاری اختلافات کا خاتمہ، قومی اتحاد کو مضبوط بنانا اور اسرائیل کے خلاف مشترکہ محاذ کو مزید مستحکم کرنا ہے۔

یہ بھی پڑھیں : وسط مدتی انتخابات میں شکست کا خوف، ٹرمپ کا ایران جنگ میں ناکامی کا ملبہ وزیرِ جنگ پر ڈالنے کا منصوبہ

الجزیرہ کی رپورٹ کے مطابق، قاہرہ میں ہونے والے ان مذاکرات میں حماس، اسلامی جہاد، پاپولر فرنٹ فار دی لبریشن آف فلسطین اور تحریک فتح کے سرکردہ رہنما شریک ہیں، اور یہ اجلاس جمعرات تک جاری رہے گا۔ مذاکرات کے اہم ترین موضوعات میں حماس اور اسلامی جہاد کی تنظیم آزادیٔ فلسطین (پی ایل او) میں شمولیت کا معاملہ، فلسطینی سیاسی نظام کی ازسرنو تشکیل اور تمام دھڑوں کی اس میں مؤثر شرکت کا جائزہ لینا شامل ہے۔

یہ مذاکرات ایک ایسے اہم موقع پر ہو رہے ہیں جب فلسطینی اتھارٹی کے صدر محمود عباس نے 11 ستمبر 2027 کو بیک وقت صدارتی اور قانون ساز انتخابات کرانے کی تاریخ کا باضابطہ اعلان کر رکھا ہے۔ قاہرہ مذاکرات کو فلسطینی سیاسی دھڑوں کے درمیان مفاہمت اور مستقبل کے سیاسی نظام میں وسیع تر شراکت داری کے حوالے سے ایک انتہائی اہم پیش رفت قرار دیا جا رہا ہے۔