فلسطینیوں کی حمایت میں اسپین کی سڑکوں پر ہزاروں افراد کا احتجاج، غاصب اسرائیل سے تعلقات توڑنے کا مطالبہ

شیعیت نیوز : اسپین کے جنوبی شہر مالاگا میں ہزاروں باشعور افراد نے سڑکوں پر نکل کر مظلوم فلسطینی عوام کے ساتھ بھرپور یکجہتی کا شاندار مظاہرہ کیا ہے۔ اس عظیم الشان احتجاجی مظاہرے کے دوران عوام نے ہسپانوی حکومت سے غاصب اسرائیل کے ساتھ تمام سفارتی اور اقتصادی تعلقات فوری طور پر ختم کرنے کا زوردار مطالبہ کیا ہے۔

ہسپانوی ذرائع ابلاغ کے مطابق، مظاہرین نے شہر کے مرکزی علاقے میں فلسطینی پرچم اٹھا رکھے تھے اور غاصب صیہونی حکومت کی بربریت کے خلاف شدید نعرے بازی کی۔ شرکاء کا دو ٹوک الفاظ میں کہنا تھا کہ غزہ میں جو کچھ ہو رہا ہے وہ محض جنگ نہیں بلکہ کھلی نسل کشی ہے، اور بالآخر فلسطین ہی غاصبوں کے خلاف فتح یاب ہوگا۔

یہ بھی پڑھیں : مسئلہ فلسطین کا حتمی حل مزاحمت اور عوامی ریفرنڈم میں پوشیدہ ہے، علمائے کرام کا مشترکہ اعلامیہ

احتجاج کے دوران عوام نے بین الاقوامی برادری پر زور دیا کہ فلسطینی عوام کے خلاف جاری وحشیانہ کارروائیوں کو روکنے کے لیے ہنگامی اور موثر اقدامات کیے جائیں۔ انہوں نے اسپین کی حکومت سے پرزور مطالبہ کیا کہ وہ غاصب اسرائیل کے خلاف فوری طور پر مکمل اسلحہ پابندی نافذ کرے اور اسلحے کی خونی تجارت کا مستقل بائیکاٹ کرے۔

اس وسیع احتجاجی مظاہرے میں انسانی حقوق کی تنظیموں، سماجی گروہوں، بائیں بازو کی سیاسی جماعتوں اور معاشرے کے مختلف طبقات سے تعلق رکھنے والے ہزاروں افراد نے شرکت کی۔ مظاہرین کے ہاتھوں میں موجود پلے کارڈز پر "نسل کشی کا خاتمہ کرو” اور "غاصب اسرائیل کے ساتھ اسلحے کی تجارت ختم کرو” جیسی واضح عبارات درج تھیں۔