ایرانی عوام کے حقوق کا ہر صورت تحفظ کریں گے، ایرانی وزیر خارجہ
17 فروری, 2026 10:25
شیعیت نیوز : ایرانی وزیر خارجہ عباس عراقچی نے جنیوا میں اپنے عمانی ہم منصب بدر بن حمد البوسعیدی سے ملاقات کے دوران کہا کہ ایران نتیجہ خیز سفارت کاری کے ذریعے ایرانی عوام کے جائز مفادات اور حقوق کے تحفظ اور خطے میں امن و استحکام کے قیام کے لیے پُرعزم ہے۔
یہ ملاقات منگل کو امریکہ اور ایران کے درمیان عمان کی ثالثی میں ہونے والے مذاکرات سے قبل پیر کے روز جنیوا میں ہوئی۔
یہ بھی پڑھیں : پابندیوں کا خاتمہ مذاکرات کا بنیادی ہدف ہے، ایرانی وزارت خارجہ
ملاقات کے دوران ایٹمی امور اور امریکہ کی ظالمانہ پابندیوں کے خاتمے سے متعلق اسلامی جمہوریہ ایران کے مؤقف اور تحفظات کو تفصیل سے بیان کیا گیا۔
ایرانی وزیر خارجہ نے موجودہ سفارتی عمل کو آگے بڑھانے میں عمانی وزیر خارجہ کی کوششوں کو سراہتے ہوئے اس بات پر زور دیا کہ ایران سنجیدگی اور پختہ عزم کے ساتھ نتیجہ خیز سفارت کاری کو بروئے کار لا کر عوام کے جائز حقوق کا تحفظ کرے گا اور خطے میں امن و استحکام کو یقینی بنائے گا۔
