اسرائیلی فوجیوں میں خودکشی کی کوششوں میں غیر معمولی اضافہ، سرکاری رپورٹ

شیعیت نیوز : مقبوضہ فلسطین میں جاری ایک سرکاری تحقیقی رپورٹ سے یہ ظاہر ہوتا ہے کہ گزشتہ 18 ماہ میں اسرائیلی فوجیوں میں خودکشی کی کوششوں میں غیر معمولی اضافہ ہوا ہے، جو فوج کے اندر بڑھتے ہوئے نفسیاتی بحران کی واضح نشاندہی کرتا ہے۔

رپورٹ اسرائیلی پارلیمنٹ (کنسٹ) کے تحقیقی و اطلاعاتی مرکز نے رکنِ پارلیمنٹ اوفر کسیف کی درخواست پر تیار کی ہے اور اس میں بتایا گیا کہ جنوری 2024 سے جولائی 2025 کے دوران مجموعی طور پر 279 فوجیوں نے خودکشی کی کوشش کی، یعنی ہر ایک خودکشی کے بدلے سات ناکام کوششیں ہوئیں۔ اعداد و شمار کے مطابق 12 فیصد کیسز کو ’’سنگین‘‘ اور 88 فیصد کو ’’درمیانہ‘‘ نوعیت کا قرار دیا گیا ہے۔

یہ بھی پڑھیں : کالعدم لشکرِ جھنگوی کے مولوی سے 10 لیٹر شراب برآمد

رپورٹ میں مزید بتایا گیا کہ 2017 سے جولائی 2025 تک مجموعی طور پر 124 اسرائیلی فوجیوں نے خودکشی کی، جن میں 68 فیصد اہلکار ڈیوٹی پر مامور، 21 فیصد ریزرو اور 11 فیصد پیشہ ور فوجی تھے۔ اعداد و شمار سے واضح ہوتا ہے کہ 2023 کے بعد سے ریزرو فوجیوں میں خودکشی کے واقعات میں نمایاں اضافہ ہوا ہے۔

رپورٹ کے مطابق صرف 17 فیصد فوجیوں نے خودکشی کی کوشش سے دو ماہ قبل کسی ماہرِ نفسیات سے ملاقات کی تھی، جو فوجی یونٹوں میں نفسیاتی مدد کے کمزور نظام کو ظاہر کرتا ہے۔ رپورٹرز اور مبصرین کا کہنا ہے کہ جنگ کے مسلسل دباؤ، لمبی ڈیوٹیز اور مناسب ذہنی معاونت کی عدم موجودگی نے فوجی اہلکاروں کے درمیان نفسیاتی مسائل کو شدت دی ہے۔