اسرائیل اور غاصب طاقتوں کے لیے سیاہ دن آنے والے ہیں، انصار اللہ یمن

شیعیت نیوز : انصاراللہ کے سیاسی دفتر نے اسرائیلی فضائی حملے کو جنگی جرم اور بزدلانہ جارحیت قرار دیا ہے۔ بیان میں کہا گیا ہے کہ یمن اپنے عزم اور استقامت کے ساتھ جنگ جاری رکھے گا۔ "ہم غزہ اور فلسطین کی حمایت کرتے رہیں گے اور یہ خون کبھی رائیگاں نہیں جائے گا۔ اسرائیل اور تمام غاصب طاقتوں کے لیے سیاہ دن آنے والے ہیں۔”

بیان میں مزید کہا گیا کہ یہ حملہ دراصل اس نسل کشی اور قتلِ عام کی جنگ کا تسلسل ہے جو فلسطین و غزہ سے شروع ہو کر لبنان، شام اور ایران تک پہنچی اور اب یمن کو بھی اپنی لپیٹ میں لے رہی ہے۔

یہ بھی پڑھیں : یمن پر صہیونی حملہ جنگی جرم، یمنی قوم سخت جواب دے گی، سپاہ پاسداران

انصاراللہ نے اپنے رہنماؤں کی شہادت کو یمن کے لیے باعثِ فخر قرار دیا اور کہا کہ ہمارے وزیرِاعظم اور وزراء کا راہِ قدس میں اور طوفان الاقصیٰ کی معرکہ آرائی کے بیچ میں شہید ہونا بڑا شرف ہے۔ یمنی عوام نے اپنی جانوں اور خون کی قربانیوں سے یہ ثابت کر دیا ہے کہ فلسطین کبھی تنہا نہیں۔ یمن اس وقت تک فلسطین کے ساتھ کھڑا رہے گا جب تک ظلم، جارحیت اور محاصرہ ختم نہیں ہوتا۔

اعلامیے میں یہ بھی کہا گیا کہ فلسطینی اور یمنی شہدا کا خون ایک ہو گیا ہے جو مسلمان کی مسلمان کے لیے نصرت کا اعلیٰ ترین مظہر ہے۔

درایں اثناء، انصاراللہ کے سیاسی دفتر کے رکن محمد البخیتی نے اس حملے کو "سرخ لکیر عبور کرنے” کے مترادف قرار دیا۔ انہوں نے کہا کہ حکومتی اجلاس کو نشانہ بنانا حد سے بڑھ جانا ہے۔ اب جنگ ایک نئے مرحلے میں داخل ہو چکی ہے اور انتقام لینا ناگزیر ہے۔ "ہم زیادہ باتیں نہیں کریں گے بلکہ عمل کے ذریعے جواب دیں گے۔”