حزب اللہ نے غرب اردن کو اسرائیل میں شامل کرنے کو استعمار کی بدترین شکل قرار دیا
یہ اقدام نہ صرف فلسطین بلکہ پورے خطے کے لیے خطرے کی گھنٹی ہے، حزب اللہ
شیعیت نیوز: حزب اللہ لبنان نے صہیونی پارلیمنٹ (کنیسٹ) میں غرب اردن کو اسرائیل میں شامل کرنے کے منصوبے کی منظوری کو جارحیت اور استعمار کی بدترین مثال قرار دیتے ہوئے شدید الفاظ میں اس کی مذمت کی ہے۔
تنظیم کی جانب سے جاری ایک بیان میں کہا گیا ہے کہ غرب اردن کو اسرائیلی حدود میں شامل کرنے کا یہ ناپاک منصوبہ، جو حالیہ دنوں میں کنیسٹ سے منظور ہوا ہے، واضح کرتا ہے کہ صہیونی حکومت کبھی کسی سرحد پر راضی نہیں ہوسکتی۔ یہ توسیع پسند حکومت نہ صرف مقبوضہ فلسطین، بلکہ بیت المقدس اور غرب اردن سے بھی آگے بڑھنے کا ارادہ رکھتی ہے۔
یہ بھی پڑھیں: اگر حملہ کیا گیا تو فوری اور بھرپور جواب دیا جائے گا، ایرانی نائب وزیر خارجہ
حزب اللہ نے مزید کہا کہ یہ فیصلہ اسرائیل کی استعماری اور غاصبانہ فطرت کو بے نقاب کرتا ہے۔ یہ اقدام صرف فلسطین ہی نہیں بلکہ پورے خطے کے لیے خطرے کی گھنٹی ہے۔ لبنان، شام اور یمن میں جو کچھ ہو رہا ہے، وہ اسی توسیع پسند صہیونی ایجنڈے کا حصہ ہے۔
تنظیم نے فلسطینی قوم کی جدوجہد کو خراجِ تحسین پیش کرتے ہوئے کہا کہ ہم صہیونی عزائم کے خلاف فلسطینی عوام کی ثابت قدمی اور مزاحمت کو سلام پیش کرتے ہیں۔ ہمیں یقین ہے کہ فلسطین کی آزادی میں ان کی پائیدار مزاحمت اہم کردار ادا کرے گی۔
آخر میں حزب اللہ نے اسلامی و عرب ممالک اور دنیا بھر کی حریت پسند اقوام سے مطالبہ کیا کہ وہ اس تاریخی ذمہ داری کو محسوس کرتے ہوئے فلسطینی عوام کے شانہ بشانہ کھڑے ہوں تاکہ استعماری طاقتوں کے ناپاک عزائم کو ناکام بنایا جا سکے۔
