یمن کا ریاض پر حملہ، کنگ خالد انٹرنیشنل ایئرپورٹ عارضی طور پر بند

شیعیت نیوز : سعودی دارالحکومت ریاض میں یمن کی جانب سے کیے گئے حملے کے بعد کنگ خالد انٹرنیشنل ایئرپورٹ کو عارضی طور پر بند کر دیا گیا ہے۔ سعودی سول ایوی ایشن حکام نے ایک نوٹس جاری کرتے ہوئے کہا کہ ریاض کے کنگ خالد انٹرنیشنل ایئرپورٹ پر کوئی بھی طیارہ لینڈ کرنے سے قاصر ہے اور تمام پروازوں کو ریاض کی فضائی حدود سے گریز کرنے کی ہدایت کی گئی ہے۔

ذرائع کے مطابق ریاض میں دھماکوں کی اطلاع کے بعد یہ فیصلہ کیا گیا۔ نئی دہلی، جدہ اور ترکی سے آنے والے تین طیارے ایئرپورٹ پر اترنے میں ناکام رہے اور انہیں متبادل ہوائی اڈوں کی طرف موڑ دیا گیا۔ سول ایوی ایشن حکام کا کہنا ہے کہ صورتحال معمول پر آنے تک فضائی آمد و رفت معطل رہے گی۔

یہ بھی پڑھیں: ایران کی امریکی سعودی جارحیت کی شدید مذمت، عراق پر حملے اقوامِ متحدہ کے چارٹر کی کھلی خلاف ورزی قرار

یمنی مسلح افواج نے اس حملے کی ذمہ داری قبول کرتے ہوئے کہا کہ یہ سعودی جارحیت کے خلاف جوابی کارروائی ہے۔ یمنی ذرائع کے مطابق یہ حملہ سعودی عرب کی جانب سے عراق اور فلسطین میں جاری جارحیت کے خلاف مزاحمتی محور کے عزم کا حصہ ہے۔ سعودی حکام نے ابھی تک حملے کی نوعیت اور ممکنہ جانی نقصان کے بارے میں کوئی سرکاری بیان جاری نہیں کیا ہے۔