صہیونی حکومت حزب اللہ کے ہتھیار چھیننے میں ناکام رہے گی، شیخ نعیم قاسم

شیعیت نیوز : حزب اللہ کے سیکریٹری جنرل شیخ نعیم قاسم نے کہا ہے کہ صہیونی حکومت حزب اللہ کے ہتھیار چھیننے میں کبھی کامیاب نہیں ہو سکتی اور ہم ہر ممکنہ جارحیت کا مقابلہ کرنے کے لیے تیار ہیں۔

انہوں نے کمانڈر علی کرکی کی یاد میں منعقدہ ایک تقریب سے خطاب کرتے ہوئے کہا: شہید کمانڈر علی کرکی حزب اللہ کے بانیوں میں سے تھے اور سید حسن نصر اللہ کے ہمراہ شہید ہوئے۔

یہ بھی پڑھیں : ترک حکومت نے انقلابی نوحہ خواں مہدی رسولی پر ترکی میں پابندی لگا دی

شیخ نعیم قاسم نے لبنان میں مزاحمت کی تاثیر پر سوال اٹھانے والوں کو مخاطب کرتے ہوئے کہا: حزب اللہ نے 1982 سے لے کر آج تک بے شمار کامیابیاں حاصل کی ہیں۔ اسرائیل کبھی بھی ہمارے ہتھیار نہیں چھین سکتا۔ اگر وہ جارحیت کرے تو ہم پوری قوت سے دفاع کریں گے۔ جب تک ہم زندہ ہیں، اسرائیل اپنے مقاصد میں کبھی کامیاب نہیں ہو سکے گا۔

انہوں نے کہا: یہ درست ہے کہ مزاحمت اسرائیل کی جنگ کو روکنے میں مکمل طور پر کامیاب نہ ہو سکی لیکن اس نے دشمن کو سرحدی علاقے سے آگے بڑھنے سے روک دیا اور جنگ کو پھیلنے نہیں دیا۔ حزب اللہ نے پچھلے 17 سال سے لبنان کی سلامتی اور استحکام کو برقرار رکھا ہے۔

حزب اللہ کے سیکریٹری جنرل نے کہا: ہم حزب اللہ کے خلاف تمام نئی سازشوں کو لبنانی قوم کے لیے ایک خطرہ سمجھتے ہیں، اور ہمیں اس کا سامنا کرنا ہوگا۔ اگر ہم نے ہتھیار ڈال دیے تو دشمن پورے ملک پر قبضہ کرلے گا۔

انہوں نے مزید کہا: امریکہ اور اسرائیل موجودہ جنگ بندی معاہدے کو اپنے مفادات کے خلاف سمجھتے ہیں اور اسی لیے وہ ایک نیا معاہدہ تجویز کر رہے ہیں جس کا اصل مقصد پورے لبنان میں حزب اللہ کو غیر مسلح کرنا ہے۔