امریکہ کا لبنانی حکومت کو حزب اللہ کو غیر مسلح کرنے کا الٹی میٹم

شیعیت نیوز : شام کے لیے امریکہ کے خصوصی نمائندے تھامس باراک نے دعویٰ کیا ہے کہ اگر لبنانی حکام چاہتے ہیں کہ اسرائیلی قابض افواج جنوبی لبنان کے مقبوضہ علاقوں سے پیچھے ہٹیں، تو انہیں نومبر کے مہینے تک حزب اللہ کو غیر مسلح کرنا ہوگا۔

روسیا الیوم کے مطابق، یہ بیان ایک ایسے وقت میں سامنے آیا ہے جب لبنان کی سیاسی قیادت اسرائیلی قبضے کے خاتمے کے لیے بارہا مطالبات کر چکی ہے۔ رپورٹ میں بتایا گیا ہے کہ دو باخبر ذرائع کے مطابق تھامس باراک کی جانب سے پیش کردہ روڈ میپ چھ صفحات پر مشتمل ہے، جس میں امریکہ کی جانب سے واضح شرائط رکھی گئی ہیں۔

یہ بھی پڑھیں : ایران کا خلیج فارس میں بارودی سرنگیں نصب کرنے کا دعویٰ، امریکہ کو آبنائے ہرمز کی بندش کا خدشہ

اس مجوزہ منصوبے میں حزب اللہ اور دیگر لبنانی مسلح گروہوں کو غیر مسلح کرنے کے ساتھ ساتھ شام کے ساتھ تعلقات کی بہتری پر بھی زور دیا گیا ہے، حالانکہ شام کے متعدد علاقوں پر اب بھی دہشت گرد گروہوں کا کنٹرول ہے۔

امریکی نمائندے نے لبنانی حکام سے مطالبہ کیا ہے کہ وہ جولائی کے آغاز تک اس منصوبے پر اپنا سرکاری ردعمل دیں تاکہ آئندہ مراحل کا تعین کیا جا سکے۔

ذرائع کے مطابق اس امریکی تجویز کا جائزہ لینے کے لیے لبنان کے وزیر اعظم، صدر اور پارلیمنٹ کے اسپیکر پر مشتمل ایک اعلیٰ سطحی کمیٹی تشکیل دی گئی ہے، جو باضابطہ طور پر امریکہ کو جواب دے گی۔