دعا اللہ سے تعلق مضبوط کرنے کا بہترین ذریعہ ہے، آیت اللہ حافظ ریاض نجفی

شیعیت نیوز : وفاق المدارس الشیعہ پاکستان کے صدر آیت اللہ حافظ سید ریاض حسین نجفی نے کہا ہے کہ ماہ رمضان المبارک میں ہم اللہ کے مہمان ہیں اور وہ ہمارا میزبان ہے۔ یہ خیال رہے کہ وہ خالق ہے اور ہم مخلوق۔ مکرم اور مقرب ترین بندہ وہ ہے جو تقویٰ اختیار کرے۔ ایسا بندہ جو اللہ کی مقرر کردہ حدود سے تجاوز نہ کرے اور اللہ کے ساتھ رابطہ برقرار رکھے، وہی متقی ہے۔

انہوں نے کہا کہ اللہ سے اپنے تعلق کو مضبوط رکھنے کا بہترین ذریعہ دعا ہے۔ اللہ کے سامنے ہم سب فقیر ہیں، غنی صرف اللہ کی ذات ہے۔ چاہے کوئی کروڑ پتی ہو یا جتنا بھی صاحبِ ثروت ہو، اللہ کی ذات کے سامنے سب محتاج ہیں۔ ان کا کہنا تھا کہ اسلام کے مخلص بنو اور دعا کرو، پھر خدا کے پاس تمہاری دعا قبول ہوگی۔

یہ بھی پڑھیں : اوکاڑہ مجلس شہادت مولا علیؑ پر سپاہ صحابہ کا حملہ، پولیس خاموش تماشائی بنی رہی

جامع مسجد علی حوزہ علمیہ جامعۃ المنتظر ماڈل ٹاؤن میں خطبہ جمعہ دیتے ہوئے حافظ ریاض نجفی نے کہا کہ دعا کرتے وقت انسان میں رغبت ہونی چاہیے کہ دعا قبول ہوگی اور ساتھ ہی خوف بھی کہ شاید قبول نہ ہو۔ انہوں نے کہا کہ اللہ کا حقیقی بندہ بننے سے انسان میں حیا پیدا ہوتی ہے اور اس کا کردار بلند ہوتا ہے۔ ان کا کہنا تھا کہ جب بارگاہِ رب العزت میں دعا کی جائے تو مکمل اعتماد ہونا چاہیے۔

حافظ ریاض نجفی نے مزید کہا کہ دعا کرنے سے ہدایت اور رہنمائی بڑھتی ہے اور انسان حوادث کا مقابلہ کرنے کے قابل ہوتا ہے۔ ان کا کہنا تھا کہ جب انسان دعا کرتا ہے تو وہ اللہ کی رحمت اور فیض کا طلبگار ہوتا ہے۔ یہ سب کمال ہے کہ انسان اتنا اچھا ہو گیا ہے کہ اللہ رب العزت سے مانگ رہا ہے۔ دعا ہمیں یہ درس دیتی ہے کہ ہم قوانینِ الٰہی پر عمل پیرا ہوں۔