ملک بھر میں شہید حسن نصراللہؒ اور شہید ہاشم صفی الدین کی یاد میں مجالس ترحیم کا انعقاد
"ہم شہدائے اسلام کے مشن کو خون کے آخری قطرے تک زندہ رکھیں گے"
شیعیت نیوز: غاصب اسرائیلی افواج کے فضائی بمباری کے نتیجے میں شہید ہونے والے حزب اللہ لبنان کے سربراہ سید مقاومت شہید حسن نصراللہؒ اور ان کے جانشین سید ہاشم صفی الدین کی تشییع جنازہ کے موقع پر مجلس وحدت مسلمین پاکستان کے سربراہ سینیٹر علامہ راجہ ناصر عباس جعفری کی ہدایت پر ایم ڈبلیو ایم کی جانب سے جبکہ آئی ایس او کی جانب سے بھی ملک بھر میں مجالس ترحیم، تعزیتی تقاریب اور عوامی اجتماعات منعقد ہوئے۔ جن میں غیور پاکستانی عوام اور عاشقان شہداء نے عقیدتی اور مذہبی جوش و جذبے کے ساتھ بھرپور شرکت کی۔
کراچی، لاہور، اسلام آباد، سکردو، گلگت، پشاور، حیدرآباد، ملتان، کوئٹہ سمیت ملک کے مختلف چھوٹے بڑے شہروں میں منعقدہ تقاریب میں شرکاء نے شہداء کے پاکیزہ لہو سے تجدید عہد کیا۔ عالمی استعمار امریکہ اور اسرائیل سے اظہار نفرت کرتے ہوئے شہداء کی یاد میں شمعیں بھی روشن کیں۔
یہ بھی پڑھیں: لندن میں شہید ڈاکٹر محمد علی نقوی کی برسی پر تکریم شہداء سیمینار کا انعقاد
مقررین نے شہدائے راہ قدس کی عظیم اور بے مثال قربانیوں کو خراج تحسین پیش کرتے ہوئے کہا کہ شہید سید حسن نصراللہؒ اور شہید ہاشم صفی الدین نے غزہ کے مظلوم اہل سنت مسلمانوں کے دفاع اور قبلہ اول کی آزادی کی راہ میں اپنی قیمتی جانیں قربان کی ہیں۔ ان قربانیوں کی بدولت دشمنان اسلام کی فرقہ واریت کے لیے کھربوں ڈالر کی سرمایہ کاری خاک میں مل چکی ہے۔
مقررین نے اس عزم کا اعادہ کیا کہ ہم خون کے آخری قطرے تک شہدائے اسلام کے مشن کو زندہ رکھیں گے۔ یہ کربلا کا راستہ ہے جس میں سخت امتحانات سے گزرنا پڑتا ہے لیکن بالآخر اس معرکہ حق و باطل میں فتح ہمیشہ حق اور اہل حق کا مقدر ہوتی ہے۔
