عراقی مزاحمت کے ڈرون حملے میں صیہونی فوج کے 2 فوجی ہلاک، 23 زخمی
عراقی اسلامی مزاحمتی محاذ کی جانب سے مقبوضہ فلسطین میں تین اہم اہداف پر ڈرون حملے، 13ویں گولانی بریگیڈ کے دو فوجی ہلاک
شیعیت نیوز: صیہونی فوج کے ترجمان "دانیئل ہگاری” نے اعلان کیا ہے کہ عراق سے داغے گئے ایک ڈرون حملے میں 13ویں گولانی بریگیڈ کے دو فوجی ہلاک ہو گئے ہیں۔ اس حملے میں 23 دیگر فوجی زخمی بھی ہوئے ہیں۔
صیہونی فوج کے ترجمان نے مزید کہا کہ مذکورہ ڈرون حملہ عراقی اسلامی مزاحمت کی جانب سے کیا گیا، جو حالیہ دنوں میں مقبوضہ فلسطین میں سرگرم ہے۔
عراقی اسلامی مزاحمتی محاذ نے چند گھنٹے قبل ایک بیان میں اعلان کیا تھا کہ اس نے مقبوضہ فلسطین میں تین مختلف اہداف کو کامیابی سے نشانہ بنایا ہے۔ ان کارروائیوں میں جدید ڈرونز کا استعمال کیا گیا، جو ان اہداف کو نشانہ بنانے کے لیے پہلی بار استعمال ہوئے ہیں۔
یہ بھی پڑھیں: لبنان اور غزہ میں جنگ بندی ایک ہی وقت میں ہونی چاہیے، ایران کے وزیر خارجہ
جمعرات کے روز بھی عراق کی اسلامی مزاحمت نے ایک جدید ڈرون کے ذریعے مقبوضہ فلسطین کے جنوبی علاقوں میں ایک اہم فوجی ٹھکانے کو نشانہ بنانے کی خبر دی تھی۔
یہ بات بھی قابل ذکر ہے کہ عراقی مزاحمت نے پچھلے ہفتے اور حالیہ مہینوں میں مقبوضہ فلسطین کے جنوبی شہر ایلات میں حساس اور اہم اہداف کو نشانہ بنایا ہے، جس سے صیہونی فوج کو بھاری نقصان پہنچا ہے۔
