فیض حمید نے فوج کے قانون کی کئی دفعات کی خلاف ورزیاں کی ہیں، آئی ایس پی آر

شیعیت نیوز : فوج کے اندر احتساب کے معاملے پر خطاب کرتے ہوئے ڈی جی آئی ایس پی آر میجر جنرل احمد شریف چوہدری نے کہا کہ خاص طور پر سوشل میڈیا پر غلط معلومات اور پروپیگنڈا پھیلانے والوں کے خلاف قانونی کارروائی کی جائے گی۔ انہوں نے ایک سوال کے جواب میں کہا کہ لیفٹیننٹ جنرل (ر) فیض حمید کا کیس وزارت دفاع کے ذریعے فوج کو بھیجا گیا، فیلڈ جنرل کورٹ مارشل شروع کرنے سے پہلے ٹاپ سٹی کیس کی تحقیقات کے لیے ایک اعلیٰ سطحی کورٹ آف انکوائری قائم کی گئی تھی۔

انہوں نے مزید کہا کہ اگر کوئی فوج میں اپنے عہدے کو ذاتی فائدے کے لیے استعمال کرتا ہے یا سیاسی ایجنڈے پر عمل کرتا ہے تو فوج کا خود احتسابی کا طریقہ کار عمل میں آئے گا۔ ڈی جی آئی ایس پی آر نے مزید کہا کہ گرفتار افسران کو ان کی پسند کا وکیل مقرر کرنے اور اپیل کا حق دینے سمیت تمام حقوق دیے جائیں گے۔ ایک سوال کے جواب میں انہوں نے کہا کہ اس پر زیادہ بات نہیں کر سکتے کیونکہ یہ زیر سماعت کیس ہے لیکن جو ضروری ہوا وہ عوام کے ساتھ شیئر کیا جائے گا اور جو بھی شخص اس کیس میں ملوث ہوگا وہ قانون کی گرفت سے نہیں بچ پائے گا۔

یہ بھی پڑھیں : ملک میں عدل و انصاف کے نظام کو فروغ دیا جائے، ایم ڈبلیو ایم کوئٹہ

انہوں نے کہا کہ شواہد پر مبنی تحقیقات سے ثابت ہوا کہ فیض حمید نے فوج کے قانون کی کئی دفعات کی خلاف ورزیاں کی ہیں اور ریٹائرمنٹ کے بعد ان کی جانب سے آرمی ایکٹ کی متعدد خلاف ورزیاں بھی سامنے آئیں، اس لیے ان بنیادوں پر فیلڈ جنرل کورٹ مارشل کی کارروائی کا آغاز کیا جا چکا ہے۔