کشمیر کے مستقبل کا فیصلہ اقوام متحدہ کے قراردادوں کے مطابق ہوگا، پاکستان

شیعیت نیوز: پاکستانی ترجمان دفتر خارجہ نے ردعمل دیتے ہوئے کہا کہ بھارتی وزیر خارجہ کا کشمیر کے حوالے سے بیان یکطرفہ ہے اور کشمیر کے مستقبل کا فیصلہ اقوام متحدہ کی قراردادوں کے مطابق ہوگا۔

ترجمان نے کہا کہ وزیر اعظم شہباز شریف اقوام متحدہ کی جنرل اسمبلی اجلاس میں شرکت کریں گے اور اس حوالے سے ایک تفصیلی اعلامیہ بھی جاری کیا جائے گا۔

انہوں نے کہا کہ اسحٰق ڈار برطانیہ کے سرکاری دورے پر ہیں، جہاں انہوں نے برطانوی سیکریٹری خارجہ ڈیوڈ لین سے ملاقات کی ہے۔ اسحٰق ڈار آج برطانیہ کے نائب وزیراعظم سے ملاقات کریں گے اور برطانیہ پارلیمنٹ کے حکام اور پاکستانی کمیونٹی سے بھی ملاقات کریں گے۔

یہ بھی پڑھیں : ملک میں عدل و انصاف کے نظام کو فروغ دیا جائے، ایم ڈبلیو ایم کوئٹہ

واضح رہے کہ بھارتی وزیر خارجہ ایس جے شنکر نے نئی دہلی میں تقریب سے خطاب کرتے ہوئے کہا تھا کہ پاکستان کے ساتھ مستقل بات چیت کا دور ختم ہو چکا ہے۔

بھارتی وزیر خارجہ کا کہنا تھا کہ جہاں تک جموں و کشمیر کے مسئلے کا تعلق ہے، وہ آرٹیکل 370 نے ختم کر دیا ہے۔ اب سوال یہ ہے کہ ہم پاکستان کے ساتھ کس قسم کے تعلقات رکھنا چاہتے ہیں؟

ایس جے شنکر کا یہ بھی کہنا تھا کہ ہم ہاتھ پر ہاتھ دھرے بیٹھے نہیں رہیں گے، معاملات چاہے مثبت سمت میں جائیں یا منفی، ہم ردِ عمل دیں گے۔