30 زائرین کی شہادت ناقابل تلافی نقصان ہے، علامہ باقرعباس زیدی
علامہ باقرعباس زیدی نے بس مالکان اور ڈرائیور حضرات سے بھی گذارش کی ہے کہ بیرون ملک سفر سے پہلے اور دوران سفر بسوں کی فٹنس کا خصوصی خیال رکھا جائے
شیعیت نیوز : مجلس وحدت مسلمین صوبہ سندھ کے صدر علامہ سید باقر عباس زیدی نے لاڑکانہ سے تعلق رکھنے والے زائرین کی بس کے عراق جاتے ہوئے ایرانی شہر یزد میں خوفناک حادثے پر دلی افسوس اور رنج کا اظہار کیا ہے۔
میڈیا سیل سے جاری اپنے تعزیتی بیان میں انہوں نے کہا کہ اس اندوہناک سانحے میں 30 زائرین کی شہادت اور 2 درجن کے قریب زائرین کا شدید زخمی ہونا ایک ناقابلِ تلافی نقصان ہے۔
انہوں نے کہا کہ زائرین کی شہادت ایک عظیم سعادت بھی ہے، جنہیں خود امام حسینؑ نے اپنی بارگاہ میں طلب کیا ہے۔ دکھ کی اس گھڑی میں ایم ڈبلیو ایم کے تمام اراکین غمزدہ خاندانوں کے ساتھ کھڑے ہیں۔
یہ بھی پڑھیں : زائرین کے غمزدہ خاندانوں کے ساتھ کھڑے ہیں: سینیٹر علامہ راجہ ناصرعباس
یہ بھی پڑھیں: پاکستان سمیت دنیا بھر میں عوام اسرائیلی مظالم کی مذمت کر رہے ہیں، علامہ علی حسنین
علامہ باقر عباس زیدی نے بس مالکان اور ڈرائیور حضرات سے بھی گذارش کی ہے کہ بیرون ملک سفر سے پہلے اور دورانِ سفر بسوں کی فٹنس کا خصوصی خیال رکھا جائے۔ بیرون ممالک خصوصاً ایران اور عراق میں بین الاقوامی طرز کے ٹریفک قوانین سے آشنائی اور ان کی پابندی کا بھی خاص خیال رکھنا ضروری ہے تاکہ اس قسم کے افسوسناک سانحات سے بچا جا سکے۔
انہوں نے شہداء کے لیے دعائے مغفرت اور زخمیوں کی جلد صحت یابی کی دعا کی ہے اور ساتھ ہی ایرانی حکومت اور تہران میں موجود پاکستانی سفارت خانے سے مطالبہ کیا ہے کہ وہ شہداء و زخمیوں کے اہل خانہ کے ساتھ فوری مکمل تعاون کو یقینی بنائیں، زخمیوں کی بہترین نگہداشت اور شہداء کے جسد خاکی کی وطن واپسی کے لیے جلد مؤثر اقدامات اٹھائے جائیں۔
۔
