امام حسینؑ کسی مسلک کے نہیں بلکہ انسانیت کے محسن ہیں، علامہ رمضان توقیر
ایس یو سی کے مرکزی نائب صدر کا ڈیرہ اسماعیل خان میں تقریب سے خطاب کرتے ہوئے کہنا تھا کہ اس دین اور شریعت رسول کو پامال ہونے سے بچانے کے لیے امام عالی مقامؑ نے باطل قوتوں کے خلاف قیام کیا۔ لہذا محرم الحرام میں قیام امن کی فضا کو برقرار رکھنے کے لئے تمام مکاتب فکر کے علمائے کرام اور عوام کو ایک دوسرے کے ساتھ تعاون کرنا چاہیے۔
شیعیت نیوز : ڈیرہ اسماعیل خان کی تحصیل پہاڑ پور کے علاقہ سید علیاں میں محرم الحرام کے حوالے سے ’’حسینؑ سب کا‘‘ پروگرام میں تحصیل سٹی میئر عمر امین خان گنڈہ پور اور شیعہ علماء کونسل پاکستان کے مرکزی نائب صدر علامہ محمد رمضان توقیر نے خصوصی شرکت کی۔
علامہ محمد رمضان توقیر نے خطاب کرتے ہوئے کہا کہ حسینؑ سب کا کے پروگرام کا مقصد تمام مکاتب فکر کے کو دعوت دینا ہے کہ امام حسینؑ کسی فرقہ، گروہ یا مسالک کے امام اور پیشوا نہیں بلکہ انسانیت کے محسن ہیں، ان کا مقصد احکام الٰہی اور اپنے نانا کے دین کی بقا تھا۔
آج ہر مسلمان حسینؑ کے نانے کے دین پر عمل پیرا ہے، اس دین اور شریعت رسول کو پامال ہونے سے بچانے کے لیے امام عالی مقامؑ نے باطل قوتوں کے خلاف قیام کیا۔
یہ بھی پڑھیں : محسن نقوی کی داؤدی بوہرہ جماعت کے سربراہ اور آیت اللہ عقیل الغروی سے ملاقات
لہذا محرم الحرام میں قیام امن کی فضا کو برقرار رکھنے کے لئے تمام مکاتب فکر کے علمائے کرام اور عوام کو ایک دوسرے کے ساتھ تعاون کرنا چاہیے۔
مذہبی رواداری اور عقیدت و احترام کے نواسہ رسول ص کے ایام کو پرامن طور بھرپور انداز میں منانے کی کوشش کریں اور ایک دوسرے کی مقدسات کا احترام کریں۔
دیگر مقررین نے بھی ’’حسینؑ سب کا‘‘ کے عنوان پر خطاب کرتے ہوئے کہا کہ نواسہ رسول کی اس عظیم قربانی کو عقیدت و احترام کے ساتھ اتحاد و وحدت اور مذہبی رواداری کے ساتھ پر امن طور منانے کی کوشش کریں گے۔
پروگرام میں قیام امن، بھائی چارے، ایام محرم الحرام میں امام بارگاہ اور جلوس عزا کے انتظامات کرنے کیلئے تحصیل پہاڑ پور کے متوالیان کی مالی معاونت بھی کی گئی۔
