کوئٹہ، مجلس وحدت مسلمین کے وفد کی گورنر بلوچستان سے ملاقات

شیعیت نیوز: مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی کی قیادت میں ایک وفد نے گورنر بلوچستان شیخ جعفر مندوخیل سے ملاقات کی۔

ملاقات میں ایم ڈبلیو ایم بلوچستان کے صوبائی نائب صدر علامہ شیخ ولایت حسین جعفری، صوبائی ڈپٹی جنرل سیکرٹری علامہ ذاکر حسین درانی، ضلع کوئٹہ سٹی جنرل سیکرٹری حاجی غلام حسین اخلاقی، نائب صدر ماسٹر یونس، ضلع ہزارہ ٹاؤن کے آغا ضیاء اور مولانا نور حسین اندرزگو شامل تھے۔

اس موقع پر گفتگو کرتے ہوئے علامہ مقصود علی ڈومکی نے کہا کہ متنازعہ نصاب تعلیم کے حوالے سے پاکستان کے کروڑوں شہریوں کو شدید تحفظات ہیں۔

درسی کتب سے متنازعہ مواد ہٹا کر اسے اتحاد بین المسلمین وحدت و اخوت اور حب الوطنی کا مظہر بنایا جائے۔

انہوں نے کہا کہ 1975 کے نصاب تعلیم پر تمام مکاتب فکر کا اتفاق ہے۔

یہ بھی پڑھیں:علامہ شبیر میثمی کا ایرانی صدر اور ان کے رفقاء کی شہادت پر اظہارِ تعزیت

متنازعہ نصاب تعلیم کی جگہ پر 1975 کا نصاب تعلیم نافذ کیا جائے۔

انہوں نے کہا کہ ماہ محرم اور صفر میں زائرین کربلا اور مقدس مقامات کی زیارت کے لئے جاتے ہیں۔

ویزا اور کانوائے میں تاخیر کے سبب زائرین کو شدید مشکلات پیش آتی ہیں۔

زائرین ایک ایک ہفتے کوئٹہ میں پریشان رہتے ہیں، لہٰذا اس سال زائرین کے لئے بروقت کانوائی کا اہتمام کیا جائے۔

انہوں نے صحبت پور میں جلوس چہلم شہدائے کربلا کے روایتی جلوس کی تفصیلات بتاتے ہوئے کہا کہ چہلم کے جلوس کے قانونی تقاضے پورے کرتے ہوئے پرمیشن دی جائے۔