میئر کراچی کی ایرانی قونصل خانے آمد، ایرانی صدر کی شہادت پر تعزیت

شیعیت نیوز:میئر کراچی و ترجمان حکومت سندھ بیرسٹر مرتضیٰ وہاب نے ایرانی قونصل خانے پہنچ کر ایرانی قونصل جنرل اور دیگر عملے سے ملاقات کی۔

ملاقات میں میئر کراچی بیرسٹر مرتضیٰ وہاب نے ایرانی صدر ابراہیم رئیسی، ایرانی وزیر خارجہ اور دیگر کی المناک حادثے میں شہادت پر تعزیت کی۔

انہوں نے کہا کہ ایرانی صدر ابراہیم رئیسی اور دیگر افراد کے ہیلی کاپٹر حادثے میں جاں بحق ہونے پر دلی دکھ ہوا ہے، یہ بہت بڑا حادثہ ہے جس پر ہمیں دلی صدمہ پہنچا ہے۔

میئر کراچی بیرسٹر مرتضیٰ وہاب نے کہا کہ دکھ کی اس گھڑی میں پاکستانی قوم ایران کے شانہ بشانہ ہے۔

یہ بھی پڑھیں:ایرانی چیف جسٹس اور پارلیمنٹ کے اسپیکر کی شہید صدر کے گھر آمد اور تعزیت

ایران اور پاکستان کے درمیان دیرینہ تعلقات ہیں، ہم ایک دوسرے کے بھائی ہیں۔

ایرنی صدر ابراہیم رئیسی ہمارے لئے محترم شخصیت تھی جو اب ہمارے درمیان نہیں ہیں۔

میئر کراچی و ترجمان حکومت سندھ بیرسٹر مرتضیٰ وہاب نے ایرانی صدر کے ایصال ثواب، ان کے درجات کی بلندی کے لئے دعا بھی کی۔

انہوں نے قونصل خانے میں تعزیتی کتاب میں تعزیتی کلمات بھی درج کئے۔