داعش کا کابل کے شیعہ علاقے میں دہشت گردانہ حملہ، چار افراد شہید و زخمی

شیعیت نیوز : کابل میں طالبان کی سیکیورٹی کمانڈ نے اعلان کیا ہے کہ اس شہر میں ایک دھماکے کے نتیجے میں ایک شخص جاں بحق اور تین دیگر زخمی ہوگئے ہیں۔

کابل میں طالبان کی سیکیورٹی کمانڈ کے ترجمان خالد زدران نے تصدیق کی ہے کہ گزشتہ رات ہونے والا دھماکا شہر کی ایک کار میں نصب بم کی وجہ سے ہوا جو کابل شہر کے کوتہ سنگی نامی علاقے میں ہوا۔

اس کار کا ڈرائیور موقع واردات پر ہی فوت ہوگیا اور تین شہری زخمی ہوئے۔

کابل کے مغرب میں ہونے والے اس دھماکے کی ذمہ داری داعش نے قبول کی ہے، داعش خراسان نے گزشتہ شب کابل شہر میں ہونے والے دھماکے کی ذمہ داری قبول کی تھی۔

یہ بھی پڑھیں : رفح پر حملے کی صورت میں کوئی مذاکرات نہیں ہونگے، اسماعیل ہنیہ

داعش نے اپنے اعلان میں دعویٰ کیا ہے کہ اس نے شیعوں کو لے جانے والی گاڑی کو طالبان کی چوکی سے گزرتے ہوئے مقناطیسی بم سے نشانہ بنایا اور اس کے نتیجے میں 10 شہری اور طالبان کے ارکان ہلاک یا زخمی ہوئے۔

اس سے قبل کابل کے مغربی علاقے میں کئی بار مسافر بردارگاڑیوں کو نشانہ بنایا جا چکا ہے اور ان میں سے زیادہ تر حملوں کی ذمہ داری دہشت گرد گروہ داعش نے قبول کی ہے۔

داعش کے حملے جاری ہیں جبکہ طالبان کا دعویٰ ہے کہ افغانستان میں داعش کا خاتمہ کر دیا گیا ہے۔