ایم ڈبلیو ایم کا یوم انہدام جنت البقیع کی مناسبت سے احتجاجی مظاہرہ

شیعیت نیوز : مجلس وحدت مسلمین ضلع اسلام آباد کے زیر اہتمام اہلیبیتؑ و اصحاب رسولﷺ کے مزارات کو منہدم کرنے کے تاریخی دن کی مناسبت سے نیشنل پریس کلب کے سامنے مطالباتی احتجاج کیا گیا۔

شرکاء نے پلے کارڈز اور بینرز اٹھا رکھے تھے، جبکہ احتجاج میں شریک لوگوں نے مزارات مقدسہ کی ازسرنو تعمیر کا مطالبہ بھی کیا۔

مطالباتی احتجاج سے خطاب کرتے ہوئے علامہ سید زاہد کاظمی نے کہا کہ آج کا ہمارا یہ احتجاج اور مظاہرہ یہودیوں کے خلاف نہیں بلکہ سعودی عرب کے متعلق ہے، کس قدر شرم کی بات ہے کہ خانوادہ رسول اکرم ص کی قبور مقدسہ کو دو مرتبہ پامال کیا گیا۔

دختر رسول خدا ص، اور اولاد و اصحاب رسول ﷺ کے مزارات کو مسمار کیا گیا۔

ہم سعودی عرب کی حکومت سے مطالبہ کرتے ہیں کہ وہ ان تاریخی مقامات کو فوری طور پر تعمیر کرے اور مسلمانوں میں پایا جانے والے ہیجانی کیفیت ختم ہو۔

شعبہ عزاداری ونگ کے مرکزی صدر ملک اقرار حسین علوی نے شرکاء سے خطاب کرتے ہوئے کہا کہ مقدس اور برگزیدہ ہستیوں کے مزارات مقدسہ کو منہدم کرنا صریحاً غلط اقدام تھا۔

یہ بھی پڑھیں : کراچی، یوم انہدام جنت البقیع پر آئی ایس او طالبات کا احتجاج

اس وقت پاکستان میں سعودی عرب کے وزیر خارجہ کی سربراہی میں آئے ہوئے وفد سے مطالبہ کرتے ہیں کہ وہ ان مقامات مقدسہ کو دوبارہ تعمیر کروائے۔

آج کا یہ احتجاج اس غیر اسلامی اور بے حرمتی پر مبنی آل سعود کے اقدام کی پرزور مذمت کرتا ہے۔

مولانا شریف نفیس نے خطاب کرتے ہوئے کہا کہ آج کے دن دنیا کے گوشے گوشے میں بسنے والے محبان محمد و آل محمد ع سراپا احتجاج ہیں، انکے دلوں میں یہ خلش ہے کہ روضوں کی بے حرمتی کرتے ہوئے پامالی کی گئی۔