اب حملوں کی صرف مذمت نہیں،منہ توڑ جواب دیں گے، وزیر داخلہ محسن نقوی

شیعیت نیوز: وفاقی وزیر داخلہ محسن نقوی نے کہا ہے کہ میرعلی چیک پوسٹ پر دشمن کے حملے کی  سب پرزور مذمت کرتے ہیں۔

قوم کو یقین دلاتے ہیں کہ اس بزدلانہ کارروائی کا دشمن کو ایسا جواب ملے گا یہ ساری زندگی یاد رکھیں گے۔

وفاقی وزیر داخلہ محسن نقوی نے کہا ہے کہ اب وہ وقت نہیں کہ دشمن حملہ کرے اور ہم صرف مذمت کریں۔

دشمن جس طرح حملہ کر رہا ہے، اس سے کہیں سخت جواب ملے گا، پوری قوم دہشت گردی کیخلاف جنگ میں متحد ہے اور پاک فوج کیساتھ ہے۔

انہوں نے کہا کہ ہم سب دشمن کی بزدلانہ کارروائیوں کا بھرپور جواب دیں گے۔

یہ بھی پڑھیں: سابق وزیر اعلیٰ سید محسن نقوی نے وفاقی وزیر کا حلف اٹھالیا

انہوں نے کہا کہ میرعلی میں شہادت کا بلند رتبہ پانیوالے لیفٹیننٹ کرنل کاشف علی، کیپٹن محمد احمد بدر سمیت 7 جوان پوری قوم کے ہیرو ہیں، پاکستانی قوم اپنے بہادر سپوتوں کو سلام پیش کرتی ہے۔

انہوں نے کہا کہ پاک فوج کے جری سپوتوں نے اپنی قیمتی جانوں کا نذرانہ دے کر دہشت گردوں کے مذموم عزائم کو ناکام بنایا۔

پاک فوج کے افسروں اور جوانوں نے اپنے قیمتی لہو سے دہشتگردی کیخلاف جنگ میں تاریخ رقم کی ہے۔

محسن نقوی نے کہا کہ شہدائے وطن کی لازوال قربانیاں نا قابل فراموش ہیں، شہداء ہمارا فخر ہیں

اور شہداء کی عظیم قربانیاں رائیگاں نہیں جائیں گی۔