پی ٹی آئی اور جماعت اسلامی کا انتخابی نتائج کیخلاف مشترکہ جدوجہد پر اتفاق

شیعیت نیوز: پاکستان تحریک انصاف اور جماعت اسلامی نے انتخابی نتائج کے خلاف مشترکہ جدوجہد پر اتفاق کیا ہے۔

کراچی میں پی ٹی آئی وفد نے ادارہ نور حق میں حافظ نعیم الرحمان سے ملاقات کی، پی ٹی آئی وفد میں حلیم عادل شیخ، علی احمد پلھ، راجا اظہر اور عالمگیر خان شامل تھے۔

ترجمان جماعت اسلامی کے مطابق ملاقات میں امیدواروں کے فارم 45 اکٹھے کرنے کے لیے مشترکہ کمیٹی تشکیل دی گئی۔

کمیٹی میں جماعت اسلامی کے راجا عارف سلطان، قاضی صدرالدین جبکہ پی ٹی آئی کے راجا اظہر اور مبشر حسن شامل ہونگے۔

یہ بھی پڑھیں:پی ٹی آئی سے سنی اتحاد کونسل کا اشتراک دراصل مجلس وحدت مسلمین سے اشتراک ہی ہے،ناصر عباس شیرازی

اس موقع پر گفتگو کرتے ہوئے حافظ نعیم نے کہا کہ ایم کیو ایم نے کسی بھی صوبائی اسمبلی کی نشست میں 5 ہزار ووٹ تک نہیں لیے۔

انہوں نے کہا کہ فارم 47 کے جعلی نتائج کو قبول نہیں کرتے، فارم 45 کے مطابق نتیجے دیئے جائیں۔

پی ٹی آئی رہنماء حلیم عادل شیخ کا کہنا تھا کہ عام انتخابات میں ملک کے آئینی اور جمہوری تشخص کو پامال کیا گیا۔

ایم کیو ایم اور پیپلزپارٹی کو جس طرح جتوایا گیا، یہ جمہوریت سے مذاق ہے۔