عراق میں امریکی چھاؤنی عین الاسد پر استقامتی گروہوں کے حملے، تین امریکی ہلاک، چھ زخمی

شیعیت نیوز: امریکہ کی عین الاسد فوجی چھاؤنی پر عراق کے اسلامی استقامتی گروہوں کے میزائل اور ڈرون حملوں میں تین امریکی فوجی ہلاک اور چھے زخمی ہوئے ہیں

عراق کی المعلومہ نیوز ایجنسی نے ایک باخبر سیکورٹی ذریعے کے حوالے سے بتایا ہے کہ امریکہ کی عین الاسد فوجی چھاؤنی پر عراق کے اسلامی استقامتی گروہوں کے میزائل اور ڈرون حملوں میں تین امریکی فوجی ہلاک اور چھے زخمی ہوئے ہیں۔

اس رپورٹ کے مطابق گزشتہ دو دن میں امریکہ کی عین الاسد فوجی چھاؤنی پر ہونے والے حملوں میں امریکی فوج کو جانی نقصان پہنچا ہے۔

اس رپورٹ کے مطابق ہلاک ہونے والوں میں ایک غیر ملکی کنٹریکٹ فوجی ہے اور دو ریگولر امریکی فوجی ہیں اور زخمی ہونے والے سبھی چھے فوجی امریکی ہیں۔

مذکورہ سیکورٹی ذریعے نے بتایا ہے کہ امریکہ کی عین الاسد فوجی چھاؤنی پر ان حملوں میں چھاؤنی کا ایک واچ ٹاور تباہ ہوگیا، ایک رن وے کو نقصان پہنچا اور چھاؤنی کی ایک عمارت میں آگ لگ گئی ۔

یہ بھی پڑھیں : شام میں امریکہ کے زیر قبضہ العمر نامی آئل فیلڈ میں مہیب دھماکہ

المعلومہ نے کہا ہے کہ عراقی سیکورٹی ذرائع نے عین الاسد پر مقاومتی تنطیموں کے حملے میں امریکی فوج کو نقصان پہچنے کا انکشاف کیا ہے۔

ذرائع کے مطابق مقاومت اسلامی کے اہلکاروں کی جانب سے ڈرون اور میزائل حملے کے بعد الانبار صوبے میں واقع امریکی فوجی اڈے کو شدید نقصان پہنچا ہے۔

اڈے کے اندر جدید ترین سہولیات پر مشتمل ہسپتال ہونے کے باوجود امریکی فوج نے زخمیوں کو اڈے سے باہر طبی امداد کے لئے بھیج دیا ہے۔

گذشتہ دنوں مقاومت اسلامی عراق نے امریکہ کی جانب سے غزہ پر حملے کے لئے صہیونی حکومت کی حمایت کے بعد عین الاسد اڈے پر میزائل حملے کا اعلان کیا تھا۔

یاد رہے کہ عراق کے اسلامی استقامتی گروہوں نے بیان جاری کرکے اعلان کیا ہے کہ غزہ کے مظلوم عوام پر غاصب صیہونی حکومت کے وحشیانہ حملوں کی امریکہ کی جانب سے حمایت کے جواب میں مغربی عراق میں عین الاسد امریکی فوجی چھاؤنی اور شمالی عراق میں الحریر فوجی اڈے پر میزائل اور ڈرون حملے کئے گئے ہیں۔