غزہ میں انسانی المیے کا اصل ذمہ دار امریکہ ہے، شمالی کوریا
شیعیت نیوز: شمالی کوریا کے سرکاری میڈیا نے غزہ میں جنگ بندی کے لیے روس اور برازیل کی قراردادوں کو ویٹو کرنے پر امریکہ اور یورپ پر کڑی تنقید کرتے ہوئے واشنگٹن کو غزہ کی المناک انسانی المیے کا اصل ذمہ دار قرار دیا ہے۔
یونہاپ نیوز نے خبر دی ہے کہ شمالی کوریا نے پیر کے روز ایک بیان میں کہا ہے کہ غزہ کی پٹی میں موجودہ انسانی المیے کی اصل ذمہ دار امریکی حکومت ہے جب کہ اسرائیل اور حماس کے درمیان موجودہ جنگ کے پیچھے بھی واشنگٹن کا ہاتھ ہے۔
شمالی کوریا کی سرکاری خبر رساں ایجنسی کے ایک شائع کردہ مضمون میں لکھا کہ امریکہ مغربی ایشیا کی موجودہ صورت حال کا اصل ذمہ دار اور بنیادی عامل ہے اور امریکہ کی جانبدارانہ اور دانستہ اشتعال انگیزی کی وجہ سے مغربی ایشیا میں قتل و غارت کی خوف ناک جنگ شدت اختیار کرتی جا رہی ہے۔
یہ بھی پڑھیں : مقاومتی گروہوں کے حملے کا خوف، مقبوضہ فلسطین سے لاکھوں صہیونی آبادکار فرار
پیانگ یانگ نے غزہ میں جنگ بندی اور انسانی امداد کی فراہمی کے لیے روس اور برازیل کی قرارداد کو ویٹو کرنے پر امریکہ اور یورپی ممالک کے اقدامات پر کڑی تنقید کرتے ہوئے کہا کہ واشنگٹن مغربی ایشیا میں حالات کو مزید بگڑنے سے روکنے کے چھوٹے مواقع کو بھی ضائع کر رہا ہے۔
جبکہ یورپی یونین ’’فیصلہ سازی اور آزاد اصولوں کے فقدان‘‘ کے سبب اس صورت حال کی حمایت کررہی ہے۔
ادھر الجزیرہ نے اطلاع دی ہے کہ گذشتہ رات غزہ کی پٹی کے مختلف علاقوں پر اسرائیلی فوج کے وحشیانہ فضائی اور آرٹلری حملوں میں مزید شدت آگئی ہے۔
اس رپورٹ کے مطابق غزہ کی پٹی کے جنوب میں واقع خان یونس میں ایک رہائشی مکان پر بمباری کے دوران ایک خاتون اور چھے فلسطینی شہید ہو گئے۔
