سویڈن میں توہین قرآن مجید کی حرکت کو دہرایا گیا تو اعلان جنگ تصور ہوگا، حسین الحمیداوی

شیعیت نیوز: عراقی حزب اللہ بٹالینز کے جنرل سکریٹری حسین الحمیداوی نے کہا ہے کہ قرآن کریم کی توہین کرنے والے کے خلاف سخت الہی سزا کے نفاذ کی کوششوں کو بڑھایا جائے۔

حسین الحمیداوی نے کہا کہ یہ ایک شرعی اور مذہبی فریضہ ہے۔

میڈیا رپورٹ کے مطابق حسین الحمیداوی نے کہا کہ سویڈن کی حکومت جان لے کہ اگر اس طرح کی توہین دوبارہ کی گئی تو اس ملک کی حکومت کے ساتھ خدا، رسول اور مومنین کے ساتھ محارب حکومت جیسا سلوک کیا جائے گا۔

یہ بھی پڑھیں : اسلامی تعاون تنظیم نے سوئیڈن کی خصوصی ایلچی کی حیثیت معطل کردی

عراق کی عصائب اہل حق موومنٹ کے سکریٹری جنرل قیس خز علی نے بھی کل اعلان کیا ہے کہ قرآن کریم کی حمایت میں عراقی عوام کا مظاہرہ، اس ملک کی قوم کی تہذیب و ثقافت کا اظہار ہے، اس سلسلے میں عراقی حکومت کا موقف عراقی عوام کی رائے اور ان کی ثقافت اور وقار کی عکاسی کرتا ہے۔

خز علی نے کہا کہ قرآن کریم کی بے حرمتی کے خلاف مسلمانوں نے جو بھی ردعمل ظاہر کیا وہ اپنے مذہب، اپنی مقدس کتاب اور عقائد کے بارے میں ان کی حساسیت اور جوش کو ظاہر کرتا ہے۔

عصائب اہل حق موومنٹ کے سکرٹری جنرل نے ڈنمارک میں قرآن کریم کی بے حرمتی کرنے والے انتہا پسند گروہ کے اقدام کے بارے میں کہا کہ اگر یہ واضح اور ثابت ہو جائے کہ یہ کارروائی ڈنمارک کی حکومت کی حمایت سے کی گئی ہے، تو اس ملک کے ساتھ سویڈن کی طرح نمٹا جائے، اسے پہلے انتباہ جاری کیا جائے اور اگر ایسا دوبارہ کیا گیا تو عراق سے ڈینش سفیر کو اخراج جب کہ ڈنمارک سے عراقی سفیر کو واپس بلایا جائے۔