اسلامی تعاون تنظیم نے سوئیڈن کی خصوصی ایلچی کی حیثیت معطل کردی

شیعیت نیوز: اسلامی تعاون تنظیم (او آئی سی) نے قرآن پاک کی بے حرمتی پر سوئیڈن کی خصوصی ایلچی کی حیثیت کو معطل کرنے کا فیصلہ کیا ہے۔

اسلامی تعاون تنظیم (او آئی سی) کے سیکرٹری جنرل حسین ابراہم طحہ نے ڈنمارک کے دارالحکومت کوپن ہیگن میں عراقی سفارت خانے کے سامنے قرآن پاک کے نسخے کو نذر آتش کرنے کی بھی شدید الفاظ میں مذمت کی۔

یہ بھی پڑھیں : جیکب آباد، شہدائے کربلا کی یاد میں پیغام کربلا کانفرنس کا انعقاد

اسلامی تعاون تنظیم کے سیکرٹری جنرل نے اسلامی مقدسات کی خلاف ورزی کے بار بار ہونے والے واقعات پر اپنے گہرے عدم اطمینان کا اظہار کرتے ہوئے مزید کہا کہ اس طرح کی کارروائیاں مذہبی منافرت، عدم برداشت اور تفریق کو ہوا دیتی ہیں، جس کے خطرناک نتائج برآمد ہوں گے۔

انہوں نے ڈنمارک کی حکومت پر زور دیا کہ وہ ایسی اشتعال انگیز کارروائیوں کو روکنے کے لیے ضروری اقدامات اٹھائے۔

رپورٹس کے مطابق او آئی سی ایگزیکٹو کمیٹی کے غیر معمولی اجلاس کی طرف سے جاری کردہ حتمی اعلامیے میں کہا گیا ہے کہ اس طرح کی اشتعال انگیزیاں شہری اور سیاسی حقوق کے بین الاقوامی معاہدے کے آرٹیکل (19) اور (20) کی روح کے خلاف ہیں۔

یہ بھی پڑھیں : امامیہ سٹوڈنٹس آرگنائزیشن کا شیعہ مسنگ پرسنز کیلئے بھوک ہڑتالی کیمپ کی حمایت کا اعلان

اجلاس میں شامل تمام ممالک نے مطالبہ کیا کہ کسی ایسے ملک سے تعلق کے سرکاری فریم ورک کا جائزہ لیتے ہوئے ممکنہ اقدامات کیے جائیں، جس میں متعلقہ حکام کی رضامندی سے قرآن کریم یا دیگر اسلامی اقدار اور علامات کی بے حرمتی کی گئی ہو، ان میں خصوصی ایلچی کا درجہ معطل کرنا بھی شامل ہے۔

اسلامی تعاون تنظیم اعلامیہ کے مطابق سیکرٹری جنرل نے اس فیصلے سے متعلق سوئیڈن کے وزیر خارجہ کو خط لکھ کر بھی آگاہ کر دیا ہے۔