سندھ ہائیکورٹ کا لاپتا افراد سے متعلق درخواستوں پر بازیابی کیلئے جے آئی ٹیز بنانے کا حکم

شیعیت نیوز: سندھ ہائیکورٹ نے لاپتا افراد سے متعلق درخواستوں پر بازیابی کیلئے جے آئی ٹیز بنانے کا حکم دیدیا۔ تفصیلات کے مطابق جسٹس نعمت اللہ پھلپوٹو کی سربراہی میں 2 رکنی بینچ کے روبرو لاپتا افراد کی بازیابی سے متعلق درخواستوں کی سماعت ہوئی۔ پولیس نے عدالت میں 3 لاپتا افراد کے حوالے سے رپورٹ پیش کر دی۔

پولیس حکام نے تصدیق کرتے ہوئے بتایا کہ وارث خان، اعظم عثمانی اور عرفان علی گھر پہنچ گئے ہیں۔ پولیس نے محمد عثمان کی گمشدگی سے متعلق بھی پیشرفت رپورٹ جمع کرائی، جس میں کہا گیا کہ محمد عثمان ایم پی او کے تحت نظر بند ہے۔ عدالت نے محمد عثمان کی بازیابی سے متعلق درخواست نمٹا دی۔

یہ بھی پڑھیں: کورنرسندھ کامران ٹیسوری نے جےڈی سی کو 4 نایاب نسل کے بیل اجتماعی قربانی کیلئے عطیہ کردیئے

علاوہ ازیں عدالت نے کے پی کے حراستی مراکز سے رپورٹس طلب کرلی۔ جسٹس نعمت اللہ پھلپوٹو نے ریمارکس دیئے کہ سیکرٹری داخلہ آئندہ سماعت پر رپورٹس پیش کریں، لاپتا افراد کی بازیابی کیلئے تمام تر وسائل بروئے کار لائے جائیں۔ عدالت نے لاپتا افراد کی بازیابی کیلئے جے آئی ٹیز بنانے کا حکم دیدیا۔