ریاستی ادارے کردار ادا کرتے توملک سے دہشتگردی ختم ہو چکی ہوتی، علامہ ریاض نجفی

شیعیت نیوز: وفاق المدارس الشیعہ پاکستان کے مرکزی صدر آیت اللہ حافظ ریاض حسین نجفی، سیکرٹری جنرل علامہ محمد افضل حیدری اور مرکزی نائب صدر علامہ سید مرید حسین نقوی نے کراچی پولیس آفس پر حملے کو بزدلانہ کارروائی قرار دیا اور واضح کیا کہ دہشت گردی کے تانے بانے کالعدم تنظیم کیساتھ ملتے ہیں، جنہوں نے بیرونی ایجنڈے کے تحت ملک میں نفرت پھیلائی اور اپنا من پسند اسلام نافذ کرنے کے دعوے کرتے رہے۔ حالانکہ وہ ملک کیساتھ مخلص تھے اور نہ ہی دین کے ساتھ۔

یہ بھی پڑھیں: عمران خان کے حوالے سے بڑا فیصلہ، ایف آئی اے اور پولیس کی تیاری مکمل

انہوں نے کہا دہشت گردی سے نمٹنا ریاستی اداروں کا کام ہے، جس کی تمام طبقات اور سیاسی جماعتوں حمایت کرنی چاہیے۔ ان کا کہنا تھا کہ دہشتگردوں کے سہولت کاروں، ان کے ٹھکانوں کو ختم اور ان کی تربیت کرنیوالے نیٹ ورک کو توڑنا ضروری ہے، مگر افسوس اس حوالے سے ریاستی ادارے اپنا کردار ادا کر رہے ہوتے تو دہشت گردی ختم ہو چکی ہوتی۔

یہ بھی پڑھیں: بانی آئی ایس او، سفیرانقلاب شہید ڈاکٹر محمدعلی نقویؒ کی 28ویں برسی کا شیڈول جاری

انہوں نے کہا کہ لگتا ہے کہ ذمہ دار حلقوں میں دہشت گردوں کے حامیوں کی نشاندہی اور ان کا خاتمہ بھی ضروری ہے۔ دہشت گردوں کو افغانستان سے لاکر پاکستان میں بسانا اور ان کو سہولیات فراہم کرنا خطرناک فیصلہ اور ملکی سلامتی کیساتھ کھیلنے کے مترادف تھا۔ پشاور کے بعد کراچی کے واقعہ نے ثابت کر دیا ہے کہ ہمارا انٹیلی جنس نیٹ ورک بھی موثر نہیں رہا، ہمیں دہشت گردی کیخلاف مضبوط پالیسی پر عملدرآمد کرنا ہوگا۔