سویڈن کے وزیر اعظم کی اسٹاک ہوم میں قرآن کریم کی بے حرمتی کی مذمت

شیعیت نیوز: سویڈن کے وزیر اعظم نے اسٹاک ہوم میں قرآن کریم کی بے حرمتی کی مذمت کرتے ہوئے اسے ’’انتہائی غیر مہذب اور گستاخانہ‘‘ فعل قرار دیا۔

سویڈن کے وزیر اعظم اوولف کرسٹرسن نے ایک ٹویٹ میں ملک کے دارالحکومت میں مسلمانوں کی مقدس کتاب کی بے حرمتی کی شدید مذمت کرتے ہوئے اسے انتہائی گستاخانہ اقدام قرار دیا۔

یاد رہے کہ سویڈن میں دائیں بازو کے کٹر رہنما ریسمس پلودن نے ترکی کے سفارت خانے کے سامنے ایک مظاہرے میں قرآن مجید اور ترکی کے پرچم کو نذر آتش کیا۔

در ایں اثنا قرآن کی بے حرمتی کے ردعمل میں سویڈن کے وزیر اعظم نے ایک ٹویٹ میں لکھا کہ آزادی اظہار ہماری جمہوریت کا ایک لازمی حصہ ہے لیکن ضروری نہیں کہ ہر قانونی چیز درست ہو۔ ایک ایسی کتاب کو جلانا جو بہت سے لوگ کی مقدس کتاب ہے انتہائی گستاخانہ اقدام ہے۔

یہ بھی پڑھیں : اسرائیل کےساتھ تعلقات کی بحالی فلسطین کے دو ریاستی حل سے مشروط ہے، سعودی عرب

انہوں نے مزید کہا کہ میں ان تمام مسلمانوں سے ہمدردی کا اظہار کرتا ہوں جو اسٹاک ہوم میں ہونے والے واقعے سے رنجیدہ ہیں۔

ترک وزیر خارجہ نے اس مذموم اقدام کی شدید الفاظ میں مذمت کرتے ہوئے کہا کہ اظہار رائے کی آزادی کی آڑ میں ہم اپنی مقدس کتاب پر ہونے والے گھناؤنے حملے کی سخت ترین الفاظ میں مذمت کرتے ہیں۔ ہماری مقدس اقدار کی توہین اور اسلام مخالف فعل کی اجازت دینا ناقابل قبول ہے۔

خیال رہے کہ قرآن سوزی کے اس اقدام نے اسٹاک ہوم اور انقرہ کے تعلقات کو پہلے سے زیادہ مزید خراب کردیا ہے۔ سویڈن نیٹو میں شامل ہونے کے لئے ترکی کی حمایت اور تائید کا شدید محتاج ہے۔

ایسے وقت میں کہ جب ترکی سویڈن سے کرد کارکنوں کی ترکی کے حوالے کرنے اور سویڈن میں ترک صدر رجب طیب اردوغان کے خلاف مظاہرات کو روکنے کے مطالبات کر رہا ہے، سویڈن کی نیٹو میں شامل ہونے کی تجویز مزید کھٹائی میں چلی گئی ہے۔