اربعین دشمن عناصر کو فتنے کا موقع نہ دیا جائے، سید مقتدیٰ صدر

شیعیت نیوز: عراق میں صدر تحریک کے سربراہ سید مقتدیٰ صدر نے چہلم سید الشہداء امام حسین علیہ السلام کے موقع پر اربعین دشمن کی سازشیں ناکام بنانے اور امن و امان کی صورتحال برقرار رکھنے پر زور دیا ہے۔

انہوں نے ٹویٹر پر اپنے پیغام میں لکھا کہ بعض ایسے عناصر ہیں، جو فتنہ و فساد برپا کرنے کے درپے ہیں۔ ہمیں امید ہے کہ اربعین دشمن اور صدام کے حامی بعثی عناصر اور ہر گھٹیا انسان سے یہ موقع چھین لیا جائے گا۔

سید مقتدیٰ الصدر نے زیارت اربعین کی اہمیت کی جانب اشارہ کرتے ہوئے کہا کہ ہم ہر اس شخص یا گروہ سے بیزاری کا اعلان کرتے ہیں، جو کسی قسم کی برائی، شدت پسندی، ٹکراو یا بدامنی پر مبنی عمل انجام دے۔

یہ بھی پڑھیں : یمن: القاعدہ اور متحدہ عرب امارات کے آلۂ کاروں میں جھڑپ، 27 ہلاک

انہوں نے کہا کہ ہم ایسے افراد سے بیزاری کا اعلان کرتے ہیں اور جو بھی اس قسم کے افراد کا مشاہدہ کرے فوراً قانون نافذ کرنے والے اداروں کو آگاہ کرے۔

سید مقتدیٰ صدر نے اس بات پر زور دیتے ہوئے کہ دینی مقدسات اور شعائر الہی کے بارے میں ہرگز کوتاہی نہیں کرنی چاہیئے کہا کہ عراق ہم سب کے ہاتھ میں امانت ہے۔

صدر تحریک کے سربراہ نے کہا کہ عراق میں چھ معصوم ہستیوں سے منسوب چار مقدس مقامات پائے جاتے ہیں، لہذا ہم سب سے یہ مطالبہ کرتے ہیں کہ وہ عراق کے قوانین کی پابندی کریں اور یہاں آنے والے تمام مہمانوں کو خوش آمدید کہتے ہیں۔

سید مقتدیٰ الصدر نے کہا کہ عراقی عوام زائرین کی خدمت کیلئے تیار ہیں۔ انہوں نے مزید کہا کہ میزبان کو چاہیئے کہ وہ مہمان کا احترام کرے۔ مہمان کو بھی چاہیئے کہ وہ اخلاق کی پابندی کرے۔ میزبان کو مہمان کی تمام ضروریات کا خیال رکھنا چاہیئے۔

انہوں نے عراقی عوام کو مخاطب قرار دیتے ہوئے کہا کہ تمام عراقی گروہ صبروتحمل کا مظاہر کرتے ہوئے آپس میں الجھنے سے گریز کریں۔ سکیورٹی فورسز کے ساتھ تعاون کریں اور سیاسی نعرے نہ لگائیں۔