رہبرمعظم آیت اللہ سید علی خامنہ ای کا آیۃ اللہ صافی گلپایگانی کے انتقال پر تعزیتی پیغام
شیعیت نیوز: ایرانی سپریم لیڈر آیت اللہ سید علی خامنہ ای نے ایک پیغام جاری کرکے فقیہ اعلی مقام اور بابصیرت مرجع تقلید آیۃ اللہ العظمیٰ الحاج شیخ لطف اللہ صافی گلپایگانی کے انتقال پر تعزیت پیش کی۔
ایرانی قائد کا تعزیتی پیغام کا متن حسب ذیل ہے:
بسم اللہ الرحمن الرحیم
فقیہ عالی مقام اور بابصیرت مرجع تقلید آیۃ اللہ العظمیٰ لطف اللہ صافی گلپایگانی رضوان اللہ علیہ کے انتقال کی افسوسناک خبر موصول ہوئی۔ وہ قم کے ‘حوزۂ علمیہ’ (اعلی دینی تعلیماتی مرکز) کے ستونوں اور علمی و عملی لحاظ سے اس مبارک مرکز کی سب سے نمایاں شخصیات اور سب سے پرانے علماء میں سے ایک تھے۔
یہ بھی پڑھیں : علامہ ساجدعلی نقوی کا مرجع عالی قدر آیت اللہ العظمیٰ صافی گلپائیگانی کی وفات کا اظہار تعزیت
موصوف، آیۃ اللہ بروجردی مرحوم کے زمانے میں اس عظیم الشان استاد کے سب سے ممتاز شاگردوں میں سے ایک، مرحوم آیۃ اللہ سید محمد رضا گلپایگانی کے زمانے میں ان کے ساتھی اور علمی مشیر اور تحریک انقلاب کے زمانے میں امام خمینی رحمۃ اللہ علیہ کے معتمد افراد میں شمار ہوتے تھے۔
مرحوم برسوں تک، نگہبان کونسل میں، اس کے کلیدی رکن شمار ہوتے تھے اور اس کے بعد بھی ہمیشہ انقلاب اور ملک کے مسائل کے بارے میں ہمدردانہ اور ذمہ دارانہ طریقے سے اپنا موقف بیان کرتے تھے۔ اکثر اپنے نظریات اور مشوروں سے حقیر کو مطلع اور بہرہ مند کیا کرتے تھے۔
مرحوم کا شعری ذوق، تاریخی حافظہ، سماجی مسائل پر عبور، اس بزرگ اور عظیم عالم دین کی شخصیت کے کچھ اور پہلو تھے۔ ان کی وفات ملک کے علمی و دینی معاشرے کے لیے باعث افسوس اور اندوہ ہے۔
میں ان کے معزز اہل خانہ، ان کے محترم بچوں اور اسی طرح معزز مراجع تقلید، حوزۂ علمیہ کے علمائے کرام، ان کے مقلدوں اور چاہنے والوں بالخصوص قم اورگلپایگان میں ان کے عقیدت مندوں کی خدمت میں تعزیت پیش کرتا ہوں اور مرحوم کے لیے خداوند عالم سے رحمت و مغفرت کی دعا کرتا ہوں۔
سید علی خامنہ ای
2 فروری 2022
