بحیرہ کیسپین میں تیل و گیس کی تلاش اور ہائیڈروکاربن ذخائر کی ترقی پر ایران اور روس کے حکام میں مذاکرات

شیعیت نیوز : اسلامی جمہوریہ ایران اور روس کے حکام نے بحیرہ کیسپین کے جنوبی حصے میں تیل و گیس کی تلاش، ہائیڈروکاربن ذخائر کی ترقی اور سمندر میں ضروری تنصیبات کی تعمیر کے امکانات پر تبادلہ خیال کیا ہے۔ اس سلسلے میں ایرانی کیسپین آئل کمپنی کے چیف ایگزیکٹو محمد حسین دانش فر نے ماسکو میں ایرانی سفارت خانے میں روس میں ایران کے سفیر کاظم جلالی سے ملاقات کی۔

یہ بھی پڑھیں : روسی صدر نے جنگ کے خاتمے کے لیے ایران کا موقف امریکی صدر تک پہنچا دیا، کریملن کا اعلان

محمد حسین دانش فر سینٹ پیٹرزبرگ میں جہاز سازی اور سمندر میں تیل و گیس کی ترقی کے جدید آلات سے متعلق ایک بین الاقوامی کانفرنس میں شرکت کے لیے روس میں موجود ہیں۔ ملاقات میں انہوں نے ایرانی سفیر کو بحیرہ کیسپین کے خطے میں تیل و گیس کی ترقی کے لیے اٹھائے گئے اقدامات، جاری سرگرمیوں، منصوبوں اور موجودہ امکانات سے آگاہ کیا۔

فریقین نے تیل و گیس کی تلاش کی سرگرمیوں کو وسعت دینے، ہائیڈروکاربن ذخائر کو ترقی دینے اور سمندر میں ضروری بنیادی ڈھانچہ قائم کرنے کے طریقوں پر غور کیا، جبکہ بحیرہ کیسپین کی تزویراتی صلاحیتوں اور اس اہم توانائی خطے میں روسی کمپنیوں کی استعداد سے فائدہ اٹھانے کے امکانات بھی زیر بحث آئے۔

ملاقات کا مقصد بحیرہ کیسپین کے جنوبی حصے میں ایران کی تیل و گیس کی صنعت کی سرگرمیوں کو وسعت دینے کے مواقع کا جائزہ لینا اور خطے میں موجود امکانات سے استفادے کے لیے عملی پیش رفت کرنا تھا۔