اسلام کی حقیقی تعلیما ت ہم تک امام حسن عسکریؑ جیسی عظیم ہستوں کی اذیت ناک قید وعالم ِجوانی میں شہادت کے نتیجے میں پہنچی ہیں، علامہ راجہ ناصرعباس

شیعیت نیوز: مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے امام حسن عسکری علیہ السلام کی شہادت کے موقع پر اپنے پیغام میں کہا ہے کہ اسلام کی سربلندی اور اسلامی تعلیمات کے فروغ کے لیے خاندان رسالت کے کردار اور قربانیوں کا احاطہ کرنا ممکن نہیں۔ زندگی کے ہر شعبے میں آئمہ اطہار علیہم السلام کے فرمودات امت مسلمہ کے لیے مشعل راہ ہیں۔ظالم و جابر حکمرانوں کے دور حکومت اور نامساعد حالات میں بھی کلمہ حق بلند کرتے رہنا اہلبیت اطہار علیہم السلام کی زندگی کا شعار رہا۔

یہ بھی پڑھیں: افغانستان میں شیعہ قوم پر قیامت ٹوٹ پڑی ، لگاتار دوسرے جمعے بھی نمازیوں پر داعشی دہشتگردوں کا بڑا حملہ

انہوں نے کہا کہ امام حسن عسکری علیہ السلام نے اپنی اٹھائیس سالہ زندگی کے کٹھن ترین دور میں بھی جس استقامت اور حوصلے سے دین حق کی تبلیغ کی وہ اپنی مثال آپ ہے۔ آپ وہ مظلوم شہید ہیں جن کی شہادت پر ان کے اہل و عیال کو کھل کر رونے بھی نہ دیا گیا۔

یہ بھی پڑھیں: حضرت امام حسن عسکری (ع) کی شہادت کے موقع پر سامرا کی فضا سوگوار

انہوں نے کہا کہ دین اسلام کی حقیقی تعلیمات ہم تک آسانی سے نہیں پہنچی اس کے لیے خاندان رسالت کے ہر فرد کو سخت ترین آزمائش اور کرب ناک اذیت سے گزرنا پڑا۔ آئمہ اطہار علیہم السلام کے ماننے والوں کو ہر طرح کی مشکلات کے لیے ہر وقت آمادہ رہنا چاہیے۔حکومتی جبر و بربریت کے حربوں سے اہلبیت ع کے ماننے والوں کو ڈرایا یا دھمکایا نہیں جا سکتا۔