عزاداروں کے پیدل چلنےپر آئینی شہری آزادی کےمتصادم مقدمات، ٹنڈومحمد خان تا حیدرآباد شاہراہ پر دھرنا
مقررین نے کہا کہ سندھ اور پنجاب میں متعصب انتظامیہ نے عزاداروں کے خلاف وہ رویہ اختیار کیا ہوا ہے جو مقبوضہ کشمیر میں بھارتی قابض افواج نے اختیار کیا ہوا ہے
شیعیت نیوز: ٹنڈو محمد خان کے مومنین کا بھرپور استقامت کا مظاہرہ، سندھ حکومت اور متعصب پولیس انتظامیہ کی جانب سے چہلم امام حسینؑ کے موقع پر نکالے جانے والے مشی جلوس کے خلاف بلاجواز ، غیر آئینی وغیر قانونی مقدمے کے اندراج کے خلاف احتجاجی دھرنا دیا گیا۔ عزاداروں کی بڑی تعداد نے مین حیدر آباد روڈ کو بلاک کرکے 5 گھنٹے طویل دھرنا دیا، عزاداروں نے نماز باجماعت بھی اداکی، پولیس انتظامیہ سے شہری آزادی کے منافی درج ایف آئی آر کے فوری خاتمے کا مطالبہ۔
تفصیلات کے مطابق ٹنڈومحمد خان کے عزاداران حسینی نے سندھ حکومت اور متعصب پولیس انتظامیہ کے ذکر نواسہ رسول ؐ کے خلاف بلاجواز اقدامات اور اربعین امام حسینؑ کے موقع پر عزاداروں کی جانب سے پیدل واک (مشی) کرنے پر درج ایف آئی آر کے فوری خاتمے کے لئےمین حیدر آباد روڈ پر 5 گھنٹے کا طویل دھرنا دیا۔
یہ بھی پڑھیں: حد ہوگئی! اب انتظامیہ اور سکیورٹی ادارے بتائیں گے کہ کس معصوم کی شہادت پر تابوت اٹھانا ہےاور کس پر نہیں ـ؟
ذرائع کے مطابق عزاداروں کے پرامن احتجاجی دھرنے کے سبب ٹنڈومحمدخان حیدرآباد شاہراہ ہر قسم کی ٹریفک کی آمد ورفت کیلئے بند ہوگئی تھی، مظاہرین سے خطاب کرتے ہوئے مجلس وحدت مسلمین سندھ کے رہنما یعقوب حسینی، ایم ڈبلیوایم کے ضلعی رہنما محب علی بھٹو، مولانا امیر حسین رحمانی، مولانا کاظم علی مطہری، مولانا ذولقرنین حیدرنے خطاب کرتے ہوئے کہا کہ اس قسم کے اوچھے ہتھکنڈے شیعیان حیدرکرارؑ کو ذکر امام حسینؑ سے نہیں روک سکتے، کسی بھی شہری کا کسی بھی شاہراہ سے گذرنا کیسے قانون کی خلاف ورزی ہوسکتا ہے ؟ دنیا کے کسی ملک میں شہریوں کے پیدل چلنے پر پابندی عائد نہیں تو پاکستان میں کس قانون کے تحت عزاداران حسینی ؑ کےخلاف مقدمے قائم کیئے جارہے ہیں۔
یہ بھی پڑھیں: حضور اکرم ؐکی رحلت اور امام حسن ؑ کی شہادت اُمت مسلمہ کےلئے سب سے بڑاسانحہ ہے ، علامہ ساجدعلی نقوی
مقررین نے کہا کہ سندھ اور پنجاب میں متعصب انتظامیہ نے عزاداروں کے خلاف وہ رویہ اختیار کیا ہوا ہے جو مقبوضہ کشمیر میں بھارتی قابض افواج نے اختیار کیا ہوا ہے، بعدازاں پولیس حکام اور دھرنے کے منتظمین کے درمیان طویل مزاکرات کے بعد اس یقین دہانی پر دھرنا پرامن طور پر ختم کرنے کا اعلان کیا گیا کہ جلد عزاداروں کے خلاف درج یہ غیر آئینی وغیر قانونی ایف آئی آر ختم کردی جائے گی۔
