افریقی ملک کانگو میں داعش کے ہاتھوں عام شہریوں کا قتل عام

شیعیت نیوز : افریقی ملک کانگو میں سرگرم سفاک داعشی دہشت گردوں نے دسیوں بے گناہ افراد کو موت کے گھاٹ اتار دیا گیا۔

اطلاعات کے مطابق افریقی ملک کانگو میں مسلح افراد نے ایک گاؤں پر حملہ کرکے 50 افراد کو قتل کر دیا۔ سیکیورٹی حکام کا کہنا ہے کہ مرنے والوں میں خواتین اور بچے بھی شامل ہیں۔

حکام کے مطابق حملہ آوروں کی بڑی تعداد نے بے گھر افراد کے کیمپ پر حملہ کیا جب کہ ہلاک ہونے والے افراد کی تعداد اس سے کہیں زیادہ ہے۔ مقامی لوگوں کا کہنا ہے کہ حملہ آوروں کا تعلق اے ڈی ایف ملیشیا گروپ سے ہے جو داعش سے وابستہ بتایا جاتا ہے۔

واضح رہے کانگو میں لسانی فسادات اور بغاوت کے باعث معاشی صورت حال نہایت خراب ہے اور معدنیات سے مالامال علاقوں پر قبضے کو لے کر حکومت اور باغیوں کے درمیان جھڑپیں روز مرہ کا معمول ہیں۔

یہ بھی پڑھیں : پی پی پی کے مقابل الیکشن لڑنےکی سزا، ایم ڈبلیوایم یوتھ کے 5کارکن بھائیوں پر مقدمہ درج ،2گرفتار

دوسری جانب نائیجریا میں موٹر سائیکل سوار مسلح افراد نے اسلامی بورڈنگ اسکول پر حملہ کردیا اور 100 سے زائد بچوں کو اغوا کرکے ساتھ لے گئے۔

اطلاعات کے مطابق مسلح افراد نے نائیجریا میں ایک بورڈنگ اسکول میں داخل ہوکر اندھا دھند فائرنگ کردی جس کے نتیجے میں ایک شخص ہلاک اور ایک زخمی ہوگیا جب کہ حملہ آور سو سے زائد بچوں کو اغوا کرکے لے گئے۔

تاحال اغوا ہونے والے بچوں کی تعداد نہیں بتائی گئی ہے۔ اس حوالے سے نائیجریا کے وزارت داخلہ کی جانب سے جاری بیان میں کہا گیا ہے کہ اسکول میں حملے کے وقت 200 بچے رہائش پذیر تھے۔ اغوا ہونے والے بچوں کی تفصیلات جمع کی جارہی ہیں۔

اسکول کے عملے کے ایک رکن نے نام نہ ظاہر کرنے کی شرط پر اے ایف پی کو بتایا کہ حملہ آور 100 سے زائد بچوں کو اغوا کرکے لے گئے تھے تاہم بعد میں 4 سے 12 سال کے کمزور بچوں کو رہا کردیا گیا تھا۔

اسی طرح ایک عینی شاہد نے رائٹرز کو بتایا کہ 20 سے 25 موٹر سائیکل سوار حملہ آور جدید اسلحے سے لیس تھے جو 150 بچوں کو اغوا کرکے لے گئے جب کہ اسکول میں 300 سے زائد بچے موجود تھے۔

واضح رہے کہ نائیجریا میں مسلح گروہ کی جانب سے تاوان کے لیے اسکول کے بچوں کا اغوا معمول کی بات بن چکی ہے، دسمبر سے تاحال 700 بچوں کو اغوا کیا جا چکا ہے۔