کرتارپور راہداری کا افتتاح خوش آئند ہے، البتہ بھارتی ہٹ دھرمی کا توڑ نکالنا ہوگا،علامہ ساجد نقوی
شیعیت نیوز: شیعہ علماء کونسل پاکستان کے سربراہ علامہ سید ساجد علی نقوی نے کہاہے کہ کرتارپور راہداری کا افتتاح خوش آئند، البتہ بھارت کی ہٹ دھرمی کا توڑ نکالنا ہوگا، ترقی کوریڈور کی کنجی امن ہے، جس کیلئے باہمی مذاکرات ضروری ہیں، پاکستان نے ہمیشہ خطے کے امن کیلئے ہاتھ آگے بڑھایا لیکن انڈیا کی جانب سے مثبت جواب نہیں دیا گیا، گزشتہ 6 دن میں مقبوضہ کشمیر میں 24 شہید اور درجنوں زخمی کر دیئے گئے، مذاکرات کے حامی لیکن ملکی وقار اور خود مختاری مظلوم کشمیریوں کی حمایت پر کوئی سمجھوتہ نہ کیا جائے۔ ان خیالات کا اظہار انہوں نے کرتارپور راہداری کے افتتاح کے حوالے سے اپنے ردعمل اور ملاقات کرنیوالے وفود سے گفتگو کرتے ہوئے کیا۔ علامہ سید ساجد علی نقوی نے کہا کہ کرتار پور راہداری کا افتتاح خوش آئند، پاکستان سکھ مذہب کیلئے مقدس سرزمین ہے یہاں آنیوالے یاتریوں کو خوش آمدید کہتے ہیں۔ انہوں نے کہاکہ پاک بھارت بہتر تعلقات خطے کے امن کیلئے ضروری ہیں لیکن اس کیلئے بھارتی ہٹ دھرمی کا توڑ نکالنا ہوگا اس کیلئے ایسی ڈپلومیسی اختیار کی جائے تاکہ یہ ہٹ دھرمی نرمی میں تبدیل ہو جائے۔
علامہ سید ساجد علی نقوی نے کہاکہ صرف گزشتہ 6 دن کے دوران مقبوضہ کشمیر میں ظلم کے پہاڑ توڑ دیئے گئے، 24 افراد کو شہید اور 50 سے زائد افراد کو زخمی کیا گیا، کیا ایسا رویہ کسی بھی جمہوری ملک کے شایان شان ہوا کرتا ہے، بھارت کشمیر میں گزشتہ طویل عرصہ سے انسانی حقوق کی ان پامالیوں کا مرتکب ہو رہا ہے جس کی مثال کم ہی ملتی ہیں۔ ہم چاہتے ہیں معاملات مذاکرات کے ذریعے حل کئے جائیں اور مہذب معاشرے اور قومیں مذاکرات کے ذریعے مسائل حل کرکے ہی ترقی کرتی ہیں کیونکہ ترقی کے کوریڈور کو کھولنے کی کنجی امن ہے لیکن یہ امن باہمی رضا مندی سے ہی قائم ہو سکتا ہے، اس امن کیلئے ملکی وقار اور خود مختاری کو مدنظر رکھتے ہوئے معاملات آگے بڑھائے جائیں۔
علامہ ساجد نقوی نے آج فلسطینیوں کے عالمی دن کے موقع پر فلسطینیوں سے اظہار یکجہتی کرتے ہوئے کہاکہ ہم فلسطینیوں کی حمایت جاری رکھیں گے اور انسانی حقوق کی عالمی تنظیمیں اور تمام اسلامی ممالک بھی خاص کردار ادا کریں اور فلسطینیوں کے حقوق کی جدوجہد کو سپورٹ کیا جائے اور ان پر ڈھائے جانے والے مظالم بند کرائیں۔
