ایران میں خودکش حملوں کی کوشش پاکستان کی مدد سے ناکام بنا دی، جواد ظریف

شیعیت نیوز:  ایرانی وزیر خارجہ محمد جواد ظریف نے انکشاف کیا ہے کہ گذشتہ روز 2 خودکش حملہ آوروں نے ایران میں داخلے کی کوشش کی، جسے پاکستان کی مدد سے ناکام بنا دیا گیا۔ جیو نیوز کے پروگرام "کیپٹل ٹاک” کے میزبان حامد میر کو انٹرویو دیتے ہوئے ایرانی وزیر خارجہ نے کہا کہ بھارتی جاسوس کلبھوشن یادیو سے متعلق جتنی بھی معلومات تھیں، وہ پاکستان کو فراہم کر دی ہیں، کسی کو بھی ایران کی سرزمین پاکستان کے خلاف ہرگز استعمال کرنے نہیں دیں گے، ایرانی وزیر خارجہ کا کہنا تھا کہ کچھ عرصے سے پاکستان کے ساتھ سکیورٹی تعلقات بہت بہتر ہوئے ہیں اور اس سلسلے میں آئندہ بھی تعاون جاری رکھیں گے۔ ایران سعودی عرب تعلقات میں پاکستان کے کردار پر بات کرتے ہوئے جواد ظریف نے کہا کہ سابق وزیراعظم نواز شریف نے ایران اور سعودی عرب میں ثالثی کا آغاز کیا اور جب وہ ایران آئے تو ان کی کوششوں کا خیرمقدم کیا گیا۔ ایرانی وزیر خارجہ نے دعویٰ کیا کہ نواز شریف جب سعودی عرب گئے اور انہوں نے ثالثی کی بات کی تو اس کا وہاں خیرمقدم نہیں ہوا۔ جواد ظریف نے کہا کہ ایران سی پیک منصوبے کا خیرمقدم کرتا ہے اور پاک ایران گیس پائپ لائن منصوبے میں ایران چین کو بھی شامل کرنے کے لئے تیار ہے۔ ایک سوال پر جواد ظریف کا کہنا تھا کہ مسئلہ کشمیر کے حل کے لئے آئندہ بھی سہولت کاری کے لئے تیار ہیں۔