سعودی سفیر کی عراقی مجلس اعلائے اسلامی کے سربراہ سید عمار حکیم سے ملاقات

عراق میں تعینات سعودی عرب کے سفیر نے عراق کی مجلس اعلائے اسلامی کے سربراہ عمار حکیم سے اہم ملاقات کی ہے۔

تفصیلات کے مطابق سعودی عرب کے سفیر عبدالعزیز الشمری نے بغداد میں عراق کی مجلس اعلائے اسلامی کے سربراہ عمار حکیم سے دوطرفہ تعلقات اور خطے کی تازہ ترین صورتحال کے بارے میں تبادلہ خیال کیا ہے۔

عمار حکیم نے سعودی سفیر سے کہا ہے کہ عوامی رضاکار فورسز نے ملک بھر سے داعشی دہشت گردوں کا خاتمہ کردیا ہے اور جنگ زدہ علاقوں میں تعمیراتی کام تیزی کے ساتھ جاری ہیں۔

عراقی رہنمانے سعودی سفیرالشمری کے ساتھ ملاقات میں داعش کے خلاف جنگ کی طرف اشارہ کرتے ہوئے کہا کہ داعش سے آزاد شدہ شہروں میں ترقیاتی منصوبوں پر کام کے لئے اسلامی جمہوری ایران، ترکی، مصر اور سعودی عرب کے تعاون کی اشد ضرورت ہے۔

عمار حکیم نے کہاکہ مذکورہ ممالک کے درمیان علاقائی سطح پر بات چیت شروع کرنا ناگزیر ہے۔خیال رہے کہ سعودی عرب عراقی حکومت کے خلاف دہشت گرد تنظیم داعش سمیت متعدد مخالف گروہوں کی حمایت کرتا رہاہے۔