ایرانی سرحدی محافظوں کے جاں بحق ہونے پر پاکستان کا اظہار افسوس

شیعیت نیوز: وزارت خارجہ نے پاکستان اور ایران کے درمیان سرحدی علاقے میں تکفیری دہشتگردوں سے جھڑپ کے دوران 9 ایرانی سرحدی محافظوں کے جاں بحق ہونے پر دکھ اور رنج کا اظہار کیا۔ وزارت خارجہ کے جاری بیان کے مطابق یہ پیغام وزیراعظم کے خصوصی مشیر برائے خارجہ امور طارق فاطمی کی جانب سے ایرانی سفیر کو بھیجا گیا۔ بیان میں کہا گیا ہے کہ پاکستان تعلقات کی مضبوطی اور سرحد کے ساتھ سکیورٹی کیلئے ایرانی حکومت سے اپنے تعاون کا اعادہ کرتا ہے۔ وزارت خارجہ کے بیان میں کہا گیا کہ اس حوالے سے دونوں ممالک کے متعلقہ حکام رابطے میں ہیں۔ پاکستان ایرانی حکومت اور عوام کیلئے اس واقعے کے سلسلے میں مخلصانہ تعزیت کا اظہار کرتا ہے۔ گذشتہ روز پاکستان سے منسلک ایرانی سرحدی صوبے سیستان بلوچستان میں مسلح عسکریت پسندوں کے ساتھ جھڑپ میں 9 ایرانی سرحدی محافظ جاں بحق ہوگئے تھے۔ ایرانی میڈیا نے حکومت کے حوالے سے دعویٰ کیا ہے کہ حالیہ حملوں میں القاعدہ سے تعلق رکھنے والی دہشتگرد تنظیم جیش العدل ملوث ہے اور اس تنظیم سے تعلق رکھنے والے جنگجو سیستان و بلوچستان میں سرگرم ہیں۔ یاد رہے کہ دہشتگرد تنظیم جیش العدل گذشتہ کچھ سالوں سے سیستان و بلوچستان کے درمیان سرحدی علاقوں میں متعدد حملے کرچکی ہے۔ مذکورہ علاقے میں سکیورٹی فورسز اور منشیات اسمگلروں کے درمیان جھڑپیں ہوتی رہتی ہیں، کیونکہ یہ علاقہ افغانستان سے منشیات کی ایران، عرب ممالک اور یورپ میں اسمگلنگ کیلئے اسعتمال ہوتا ہے۔