سانحہ اے پی ایس کی دوسری برسی کی مرکزی تقریب کا آرمی پبلک سکول میں انعقاد

شیعیت نیوز:  پشاور اے پی ایس سانحے میں جان قربان کرنے والے بچوں اور اساتذہ کی یاد میں دوسری برسی کی مرکزی تقریب آرمی پبلک اسکول پشاور میں منعقد ہوئی، جس میں چیف آف آرمی اسٹاف جنرل قمر جاوید باجوہ بھی شریک ہوئے۔ تقریب کا آغاز اے پی ایس کے بہادر بچوں نے تلاوت قرآن پاک سے کیا، جس کے بعد اسکول پرنسپل نے مہمان خصوصی جنرل قمر جاوید کو یادگار شہداء پر پھول چڑھانے کی دعوت دی۔ پاک فوج کے سپہ سالار جنرل جاوید قمر باجوہ نے یادگار شہداء پر سلامی دی، پھول چڑھائے اور شہداء کی بلندی درجات کے لئے ہونے والی دعا کا حصہ بنے۔ پرنسپل آرمی پبلک اسکول نے تقریب کے آغاز میں 2014ء میں شہید ہونے والے طلبہ سمیت 140 سے زائد افراد کو خراجِ عقیدت پیش کرتے ہوئے کہا کہ مسز طاہرہ قاضی، اساتذہ اور بچوں کی شہادت نے قوم کو مضبوط اور متحد کر دیا، ہم عہد کرتے ہیں کہ انہیں ہمیشہ یاد رکھیں گے اور ان کی شہادت کو اپنے لیے بہادری اور عظمت کا نشان بنا کر رکھیں گے۔ تقریب میں شہداء کے والدین اور اہل خانہ کی بڑی تعداد موجود تھی۔

دوسری جانب وزیراعظم نواز شریف نے سانحہ اے پی ایس کی دوسری برسی پر متاثرہ خاندانوں سے اظہار ہمدردی کرتے ہوئے کہا کہ پوری قوم دکھ کے اس لمحے میں متاثرہ خاندانوں کے ساتھ کھڑی ہے اور ہم آج کے دن کے دکھ کو کبھی نہیں بھول سکتے۔ انہوں نے مزید کہا کہ ہم نے دہشت گردی کے مکمل خاتمے کے لئے پوری قوت استعمال کرنے کا فیصلہ کیا اور چھوٹے فرشتوں کو شہید کرنے والوں پر رحم نہیں کیا جائے گا۔ ان کا کہنا تھا کہ دنیا نے دیکھا ہم نے دہشت گردوں کے نیٹ ورک کو تباہ کر دیا اور دہشت گردوں کی کمر توڑ کر رکھ دی ہے۔ وزیراعظم نے قوم کو یقین دلاتے ہوئے کہا کہ بقاء کی اس جنگ میں ہم نے بے مثال قربانیاں دی ہیں، دہشت گردوں کے خلاف جاری اس جنگ کو منطقی انجام تک پہنچا کر چھوڑا جائے گا اور آئندہ نسلوں کے لیے پرامن اور مستحکم پاکستان یقینی بنائیں گے۔