ایران سعودی عرب مسائل کو پاکستان کے اندر لانے سے گریز کیا جانا چاہیے،علامہ عارف واحدی

شیعیت نیوز: اسلامی تحریک پاکستان کے مرکزی سیکرٹری جنرل علامہ عارف حسین واحدی کہتے ہیں ملک سے باہر کے مسائل کو پاکستان کے اندر لانے سے گریز کیا جانا چاہیے، پاکستان میںعلامہ ساجد نقوی نے دیگر بزرگان کے ساتھ اتحاد کے بانی بنکر بہترین انداز میں کردار ادا کرکے ماحول ساز گار کیا اور مختلف فتنوں سے ملک کو پاک رکھا، ہماری قیادت ملک میں اتحاد و بھائی چارے کے بانیوں میں ہے، کسی کو اس فضاء کو خراب کرنے کی اجازت نہیں دی جاسکتی۔ان خیالات کا اظہار انہوں نے مختلف وفود سے گفتگو کرتے ہوئے کیا۔ علامہ عارف حسین واحدی کا کہنا تھا کہ چند روز سے کچھ عناصر کی جانب سے ایسے مسائل کا تذکرہ کیا جارہاہے جن کا ہمارے ملک سے براہ راست کوئی تعلق نہیں ہے، اس لئے ایسے مسائل کو پاکستان کے اندر لانے سے گریز کیا جائے، کیونکہ پاکستان کی ساخت اور بافت میں بڑی گنجائش اتفاق و اخوت ہے جسے صحیح رخ اور درست سمت میں بروئے کار لاتے ہوئے بہت سے مسائل ماضی میں حل بھی کئے گئے اور اب بھی کئے جاسکتے ہیں جس کی بہت سی مثالیں موجود ہیں۔

ان کا مزید کہنا تھاکہ علامہ سید ساجد علی نقوی نے دیگر اکابرین و بزرگان کے ساتھ بانی بن کر بہترین انداز میں ملک میں باہمی احترام کے فروغ کے ساتھ تمام مسائل حل کئے، ہماری قیادت نے اس ملک میں اتحاد و یگانگت اور بھائی چارگی کیلئے دیگر بزرگوں کے ساتھ ملکر بنیاد رکھی، ملی یکجہتی کونسل ، متحدہ مجلس عمل اور پھر ملی یکجہتی کونسل کا نئے عزم کے ساتھ احیاء اس کی واضح مثالیں ہیں ، جن کی واضح خصوصیات ہیں کہ ملک کے اندر تمام عقائد کو مد نظر رکھتے ہوئے متفقہ ضابطہ اخلاق مرتب کئے ،مشترکات پر زور دیتے ہوئے مسائل کا حل پیش کیا اور یہ کوششیں بارآور بھی ثابت ہوئیں ، انہی کامیاب کوششوں کو نتیجہ تھا کہ بیرونی اختلافات اور مختلف فتنوں سے اس وطن کو پاک رکھا ۔ اب ضرورت اس امر کی ہے کہ وہ لوگ جو اتحاد کے دعویدار ہیں اس نکتہ کو ملحوظ خاطر رکھیں کہ کسی کی مخالفت یا حمایت سے مسئلہ حل نہیں ہوتا ۔ ہمیں تمام صورتحال کے حوالے سے اپنی معاشرتی ذمہ داریوں کا بھی احساس ہونا چاہیے اور کوشش کرنی چاہیے کہ ایسے کسی عمل کی ترویج یا اس کا حصہ نہ بنیں جس سے یہ فضا متاثر ہے.