دہشتگردی سے چھٹکارے کا واحد حل نیشنل ایکشن پلان پر اسکی روح کیمطابق عمل کرنا ہے، علامہ ناصر عباس
مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے مردان کی ضلع کچہری میں خودکش حملے کی شدید مذمت کرتے ہوئے کہا ہے کہ دہشت گرد عناصر امن و امان کے ذمہ دار اداروں کے لئے چیلنج بنتے جا رہے ہیں۔ سکیورٹی کی مخدوش صورتحال عوام کے لئے اضطراب اور عدم تحفظ کا باعث ہے۔ حکومت کی طرف سے دہشت گردی کے خلاف جب تک موثر حکمت عملی نہیں اپنائی جاتی، تب تک وطن عزیز میں اس طرح کے واقعات پر مکمل قابو پانا ممکن نہیں۔ انہوں نے کہا کہ دہشت گردوں کے سہولت کاروں کو اگر انصاف کے کٹہرے میں لایا جاتا تو آج ان مذموم عناصر کے حوصلے اس طرح بلند نہ ہوتے۔ اس واقعہ میں وکلا سمیت دیگر بےگناہ افراد کی قیمتی جانوں کا ضیاع ایک ناقابل تلافی نقصان اور درد ناک سانحہ ہے۔ اس طرح کے واقعات سے متعلقہ اداروں کو قبل ازوقت آگاہ نہ کیا جانا ملک کے تحقیقاتی اور سکیورٹی اداروں کی کارکردگی پر سوالیہ نشان ہے۔ عوام کی جان و مال کا تحفظ ریاست کی اولین ذمہ داری ہے۔ دہشت گردی کے عفریت سے چھٹکارے کا واحد حل نیشنل ایکشن پلان پر اس کی روح کے مطابق عمل کرنا ہے۔ نیشنل ایکشن پلان کو موثر انداز میں آگے بڑھایا جانا ناگزیر ہے، تاکہ دہشت گرد عناصر کا قلع قمع ہو۔ نیشنل ایکشن پلان پر عمل درآمد میں پوری قوم حکومت کے ساتھ کھڑی ہوگی۔ علامہ ناصر عباس جعفری نے واقعہ میں شہید ہونے والے افراد کے بلندی درجات اور پسماندگان کے لیے صبر جمیل کی دعا کی ہے۔
