عراق: خالدیہ کے آپریشن میں داعش کے ایک ہزار سے زائد دہشت گرد ہلاک

عراق کی البدر تنظیم کے سیکریٹری جنرل ہادی العامری نے  اعلان کیا ہے کہ صوبہ الانبار کے جزیرہ خالدیہ کو داعش سے آزاد کرانے کے آپریشن میں ایک ہزار سے زائد دہشت گرد ہلاک کئے گئے۔ انھوں نے کہا کہ عوامی رضاکار فورس الحشد الشعبی کے جوانوں نے داعش کے بہت سے دہشت گردوں کو گرفتار کر لیا۔ عراق سے موصولہ ایک اور رپورٹ میں بتایا گیا ہے کہ عراق کے صوبہ صلاح الدین کے علاقے بیجی میں تکفیری دہشت گرد گروہ داعش کا ایک ہیلی کاپٹر مار گرایا گیا۔ عراقی فوج نے ایک مہینے قبل فلوجہ کو آزاد کرانے کے آپریشن کے ساتھ ہی صوبہ صلاح الدین میں دیگر علاقوں کو آزاد کرانے کے لئے بھی متعدد آپریشن انجام دیئے جن میں درجنوں دیہات اور موصل کے جنوب میں متعدد اہم علاقے داعش کے قبضے سے آزاد کرا لئے گئے۔