کربلا کے شہداء نے اپنے خون سے حق اور باطل کے درمیان امتیازی لکیر کھینچی، عمران خان

پاکستان تحریک انصاف کے چیئرمین عمران خان کا کہنا ہے کہ وقت آ گیا ہے کہ معاشرے کے تمام طبقات ظلم کے خلاف اٹھ کھڑے ہوں۔ یوم عاشور کے موقع پر جاری اپنے بیان میں عمران خان کا کہنا تھا کہ کربلا میں حضرت امام حسین علیہ السلام اوران کے ساتھیوں نے ظلم کے خلاف جدوجہد کی آفاقی مثال قائم کی، عدل و انصاف پر مبنی نظام کے قیام کے لئے شہدائے کربلا کی تاریخ سے رہنمائی حاصل کی جائے۔ عمران خان کا کہنا تھا کہ واقعہ کربلا سے ثابت ہوتا ہے کہ ریاستی قوت سے نظریات مسخ نہیں کئے جاسکتے، کربلا کے شہداء نے اپنے خون سے حق اور باطل کے درمیان امتیازی لکیر کھینچی۔ شہدائے کربلا کی لازوال قربانیاں ہمیشہ یاد رکھی جائیں گی۔