جہاد کے نام پر دہشت گردی ہو رہی ہے، آصف علی زرداری
لاہور میں پیپلز پارٹی سوشل سروسز ونگ کی تقریب سے خطاب کرتے ہوئے پیپلز پارٹی کے شریک چیئرمین اور سابق صدر مملکت آصف علی زرداری نے کہا ہے کہ فاسٹ باولر کو اگر وکٹ نہ ملے تو وہ اُکتا جاتا ہے لیکن جلد باز سن لیں سیاست کوئی کرکٹ نہیں۔ آصف زرداری کا کہنا تھا کہ ملک اور قوم میں انارکی پھیلانے کی کوشش کی جا رہی ہے لیکن ہمیں ہر حال میں جمہوریت کا دفاع کرنا ہے اور ہم ٹیسٹ میچ کھیل رہے ہیں، ون ڈے یا ٹی ٹوئنٹی نہیں۔ انہوں نے کہا کہ ٹیسٹ میچ میں صبر ہوتا ہے اور اگر فاسٹ باولر کو وکٹ نہ ملے تو وہ اُکتانے لگتا ہے لیکن سیاست کرکٹ سے مختلف ہے جس میں صبر و تحمل سے کام لیا جاتا ہے۔ پیپلز پارٹی کے شریک چیئرمین کا کہنا تھا کہ میچ کھیلنے والوں کو گیندیں کرنے دیں، اس دوران ہمیں اپنی جماعت کو منظم کرنے کا وقت مل جائے گا، جب کہ جو جماعتیں شہر بند کرانے پر دوسروں کو تنقید کا نشانہ بناتی تھیں وہ خود اسی ڈگر پر چل پڑی ہیں، تاہم موجودہ حالات میں سوچ و بیچار کے بعد ہی کوئی فیصلہ کیا جائے گا۔ انہوں نے کہا کہ جس طرح بھٹو کی سوچ کو ضیاالحق ختم نہیں کر سکے، اسی طرح دہشت گرد محترمہ بے نظیر بھٹو کی سوچ کو کبھی ختم نہیں کر سکیں گے، جب کہ ہمیں ایسے شیطان کا سامنا ہے جس کا نہ سر ہے اور نہ پیر، اور جہاد کے نام پر جو دہشت گردی ہو رہی ہے اس میں مرنے اور مارنے والے دونوں ہی کلمہ پڑھتے ہیں۔
